Sentyabrın 6-7-də Beynəlxalq Notariat İttifaqın Beynəlxalq Notariat Əməkdaşlığı Komissiyasının prezidenti Riçard Bokun rəhbərlik etdiyi nümayəndə heyəti Azərbaycanda səfərdə olub.

AZƏRTAC xəbər verir ki, sentyabrın 7-də qonaqlar Azərbaycan Notariat Palatasının inzibati binası ilə tanış olub və mətbuat üçün brifinq keçiriblər.

Tədbirin keçirilməsində məqsəd Azərbaycanın Beynəlxalq Notariat İttifaqına üzvlüyünə və əməkdaşlığa dair ictimaiyyətə məlumat vermək olub.

Qeyd edilib ki, Prezident İlham Əliyevin rəhbərliyi ilə ədliyyə sistemində aparılan islahatlar çərçivəsində notariat xidmətinin fəaliyyəti müasirləşdirilir, notarius korpusu şəffaf prosedurlar əsasında komplektləşdirilir, xüsusi notariat institutu geniş tətbiq olunur. Notariat ofislərini vahid şəbəkədə birləşdirən “Elektron notariat” informasiya sisteminin istifadəyə verilməsi notariat hərəkətlərinin rəsmiləşdirilməsini xeyli sadələşdirib. Rəqəmsal innovasiyalar tətbiq olunmaqla elektron və mobil xidmətlərin tətbiqi insanların bu orqanlara əlçatanlığını asanlaşdırıb.

Eyni zamanda notariusların peşəkarlığının artırılmasına, mütərəqqi beynəlxalq təcrübələrə yiyələnmələrinə, beynəlxalq əlaqələrinin genişlənməsinə böyük əhəmiyyət verilərək notariusların müstəqil özünüidarə orqanı olan Azərbaycan Notariat Palatası yaradılaraq səmərəli fəaliyyət göstərir. Həyata keçirilən islahatlar, həmçinin ölkəmizin sıx əməkdaşlıq etdiyi dünyanın 80-dən çox dövlətinin notariuslarını birləşdirən Beynəlxalq Notariat İttifaqına üzv qəbul olunmasına geniş imkan yaradıb.

Brifinqdə iştirak edən Azərbaycan Notariat Palatası İdarə Heyətinin sədri Hüseyn Məmmədov və Beynəlxalq Notariat İttifaqının Beynəlxalq Notarial Əməkdaşlığı Komissiyasının Prezidenti Riçard Bokun rəhbərlik etdiyi nümayəndə heyətinin Azərbaycana səfəri barədə məlumat verilib.

Səfər zamanı Ədliyyə Nazirliyində görüş keçirilərək ölkəmizdə notariat sahəsində həyata keçirilən islahatlar və tətbiq olunan yeniliklər barədə səmərəli fikir mübadiləsi aparılıb. Nazir müavini Eldar Nuriyev Beynəlxalq Notariat İttifaqı ilə fəal əməkdaşlığı, birgə tədbirlərin faydasını vurğulayıb, notariusların fəaliyyətinin əlaqələndirilməsində, onların bilik və bacarıqlarının artırılmasında Notariat Palatasının yaxından iştirakını qeyd edib.

Qonaq ölkəmizdə notariat sisteminin qabaqcıl təcrübələrə əsaslandığını bildirərək bu sahədə nailiyyətləri təqdir edib, Azərbaycan Notariat Palatasının İttifaqın üzvlüyünə qəbul olunması ilə bağlı zəruri olan latın notariatı prinsiplərinə cavab verdiyini vurğulayıb.

Tədbirdə “Elektron notariat və innovativ həllər” mövzusunda təqdimat nümayiş etdirilib, qonaqları maraqlandıran suallar cavablandırılıb.

Nümayəndə heyəti həmçinin, Nazirliyin Dövlət notariat arxivinin fəaliyyəti ilə tanış olub. Bildirilib ki, burada 2 milyona yaxın fiziki və hüquqi şəxslərə aid notariat sənədləri saxlanılır və onlar Ədliyyə Nazirliyi ilə Notariat Palatasının birgə layihəsi çərçivəsində rəqəmsallaşdırılaraq “Elektron notariat” informasiya sisteminə daxil edilib.

Səfər çərçivəsində qonaqların Milli Məclisdə, Ali Məhkəmədə görüşləri olub, Notariat Palatasının fəaliyyəti, habelə paytaxtda və bölgələrdə, o cümlədən Şamaxı regional “ASAN xidmət” mərkəzində notariat ofislərinin işi ilə tanışlıq təşkil edilib.