Oktyabrın 12-də “Yaban Bulvar” restoranında ölkəmizi beynəlxalq çempionatlarda təmsil edəcək Azərbaycan Milli Kulinariya komandasının təqdimat mərasimi keçirilib.

AZƏRTAC xəbər verir ki, Azərbaycan Milli Kulinariya Mərkəzinin qərarı ilə qarşıdan gələn beynəlxalq yarışlarda kulinariya komandamızı “Yaban Bulvar” restoranı təmsil edəcək.

Azərbaycan Milli Kulinariya Mərkəzinin direktoru Tahir Əmiraslanov bildirib ki, cari ilin dekabrında Türkiyədə beynəlxalq kulinariya çempionatı keçiriləcək. Azərbaycanı bu yarışda 10 nəfərdən ibarət komanda təmsil edəcək. Heyətə Azərbaycan Milli Kulinariya komandasının üzvləri daxildir.

Tahir Əmiraslanov Azərbaycan Milli Kulinariya Assosiasiyasının diplomunu restorana təqdim edərək bildirib ki, diplom bir il müddətinə qüvvədədir. Əgər restoran öz səviyyəsini il ərzində qoruyarsa diplom növbəti ildə yenilənəcək.

“Yaban Bulvar” restoran şəbəkəsinin rəhbəri Rəşid Hüseynov göstərilən etimadı doğruldacaqlarına söz verib. O deyib: “Çalışırıq göstərilən xidməti peşəkar səviyyədə saxlayaq. Ümid edirəm restoranımız ölkəmizə gələn turistlər üçün yaddaqalan bir məkana çevriləcək”.

Sonra R.Hüseynov Azərbaycan Milli Kulinariya Mərkəzinin 30 illik yubiley medalı ilə təltif edilib.

Tədbirdə “Yaban Bulvar” restoranının iaşə standartlarına uyğunluğu, yemək və xidmətlərinin yüksək səviyyədə olması nəzərə alınaraq Azərbaycan Milli Kulinariya Assosiasiyasına üzviliyə qəbul olunub.

Qeyd edib ki, yaxın zamanlarda Tahir Əmiraslanovun “Dolmalar” kitabı ingilis dilinə tərcümə ediləcək.