Balaxanı Sənaye Parkında təkrar emal üçün nəzərdə tutulan müasir avadanlıqlar quraşdırılıb. 2017-ci ildən bu günə kimi fəaliyyət göstərən sənaye parkında 25 rezident qeydiyyatdan keçib. Beləcə, təkrar emal vasitəsilə təbiətin çirklənməsinin qarşısı alınır və yaşıl iqtisadiyyata böyük töhfə verilir.

AZƏRTAC xəbər verir ki, Sənaye Parkının ərazisi ilkin mərhələdə 7 hektar olsa da, sahibkarların marağının artması nəticəsində 10,15 hektara çatdırılıb. Sənaye Parkında qeydiyyatdan keçərək fəaliyyət göstərən rezidentlərə dövlət tərəfindən tətbiq edilən güzəştlər isə buranı istehsalçılar üçün əlverişli işgüzar mühitə çevirib. Belə ki, sahibkarlar ƏDV, mənfəət, torpaq və əmlak vergisindən 10 il, istehsal məqsədilə idxal edilən texnoloji avadanlıqlar isə 7 il müddətinə gömrük rüsumundan azad olunur. Balaxanı Sənaye Parkında son 5 ildə 1000 yeni iş yeri yaradılıb.

“Təmiz şəhər” ASC-nin ictimaiyyətlə əlaqələr şöbəsinin müdiri Orxan Cabbarov jurnalistlərə açıqlamasında 7 ildə qazanılan uğurlardan danışıb: Tullantıların 27 istiqamət üzrə təkrar emalı ilə bağlı olaraq 25 rezident qeydiyyatdan keçib. Bu məkana hazırkı dövrə qədər ümumilikdə 52 milyon manat həcmində investisiya yatırılıb. 2017-ci ildən bu günə qədər 229 milyon manat həcmində məhsul istehsal olunub. 23 milyon manat dəyərində məhsul isə xarici ölkələrə ixrac edilib.

Marın 18-də - Qlobal Təkrar Emal Günündə “Təmiz Şəhər” ASC-nin təsərrüfat sahələrinə məlumat turu təşkil olunub. COP29 Kommunikasiya qrupu tərəfindən təşkil olunan turda ictimai şəxslər, blogerlər, media nümayəndələri iştirak edib. Tur COP29-un ölkə üçün əhəmiyyəti barədə məlumatlılıq səviyyəsinin artırılması məqsədi daşıyıb.

İllik emal gücü 500 min ton olan Bərk məişət tullantılarının yandırılması zavodu buxar enerjisini elektrik enerjisinə çevirir. Zavod özü də məhz bu enerji ilə fəaliyyət göstərir. Zavod istehsal gücünə görə Şərqi Avropa və MDB məkanında bu tipli ən iri müəssisə hesab olunur. Bura dördüncü nəsil (4G) texnologiyaların tətbiqi ilə Avropa İttifaqının ətraf mühitin mühafizəsi sahəsində ən sərt normativlərinə tam cavab verən qaydada inşa olunub.

Bakı şəhərində 8 rayona quraşdırılan məişət qutularının narıncı rənginə atılan tullantılar ən son mərhələdə Balaxanı Sənaye Parkına gətirilərək təkrar emal edilir. Yaşıl rəngdə qutuya atılan tullantılar isə ya zavodda yandırılır, ya da basdırma üsulu ilə məhv edilir. “Yaşıl dünya naminə həmrəylik ili”ndə olduğumuzu nəzərə alaraq, gəlin, məişət tullantılarının təkrar emal edilməsinin nə dərəcədə əhəmiyyətli olduğunu unutmayaq.