Bakının ilk dəfə ev sahibliyi etdiyi sumo üzrə dünya çempionatının açılış mərasimi keçirilib.

AZƏRTAC xəbər verir ki, Bakı İdman Sarayında təşkil olunan tədbirdə əvvəlcə iştirakçı ölkələrin bayraqları arenaya gətirilib.

Gənclər və idman naziri Fərid Qayıbov çıxışında sumo üzrə dünya çempionatının Bakıda keçirilməsini yüksək qiymətləndirib. O, Azərbaycanda idmana dövlət səviyyəsində xüsusi diqqət və qayğı göstərildiyini vurğulayıb.

Yapon Döyüş Növləri və Mədəniyyəti Assosiasiyasının prezidenti Atil Ağamirov yarışın ölkələr arasında dostluq münasibətlərinin möhkəmlənməsinə töhfə verəcəyini bildirib.

Beynəlxalq Sumo Federasiyasının prezidenti Şo Hakuho isə ilk növbədə, dünya çempionatına ev sahibliyi etməsi və 18 oktyabr - Müstəqilliyin Bərpası Günü münasibətilə Azərbaycan xalqını təbrik edib. O, tədbirin təşkilində əməyi olan bütün təşkilatçılara, heyətə və iştirakçılara təşəkkürünü bildirib.

Şo Hakuho qeyd edib ki, ötən il Akio Toyodadan sonra Beynəlxalq Sumo Federasiyasının prezidenti vəzifəsinə seçilmək onun üçün böyük şərəfdir. O, sumonun dünyanın müxtəlif ölkələrində inkişaf etdiyini, idmançıların və azarkeşlərin bu yarışda bir araya gəlməsinin xüsusi əhəmiyyət daşıdığını vurğulayıb.

Daha sonra Azərbaycanın Dövlət Himni səsləndirilib. Açılış mərasimi bədii hissə ilə davam edib.

Qeyd edək ki, beynəlxalq yarışda dünyanın 30-a yaxın ölkəsindən müxtəlif yaş qruplarını təmsil edən idmançılar medallar uğrunda mübarizə aparırlar. Yarışlar ənənəvi yapon sumosunun ruhunu yaşadan, xüsusi hazırlanmış torpaq "dohyo" meydanında keçirilir. Ötən gün 18 yaşadək qızlar və oğlanlar arasında fərdi və komanda yarışları baş tutub, bu gün isə kişilər və qadınlar arasında fərdi və komanda yarışları təşkil olunur.

Turnirdə ənənəvi peşəkar yapon sumosu deyil, beynəlxalq həvəskar sumo qaydaları əsas götürülür. Bu sistemdə rəqiblər çəki dərəcələrinə uyğun qarşılaşır, qadın idmançılar üçün də ayrıca yarışlar keçirilir.

Xatırladaq ki, Azərbaycanın sumo üzrə beynəlxalq arenada iştirakı 2007-ci ildən başlayır.