Türk Dövlətləri Təşkilatının (TDT) müsəlman dini idarə rəhbərləri Şurasının 7-ci görüşü çərçivəsində “Gülüstan” sarayında tanınmış azərbaycanlı mütəfəkkir alim Şeyx Seyyid Yəhya Bakuvi Şirvaniyə (XV əsr) həsr olunmuş beynəlxalq elmi-praktiki Konfransın Plenar iclası keçirilib.

AZƏRTAC xəbər verir ki, “İslam dünyasının mədəni irsində Seyyid Yəhya Bakuvi zirvəsi: Mötədil dəyərlər və müasir çağırışlar” mövzusunda keçirilən Birinci Beynəlxalq elmi-praktiki Konfransın həmtəşkilatçıları Qafqaz Müsəlmanları İdarəsi və TDT ilə birgə Azərbaycan Milli Elmlər Akademiyası, ISESCO, İRSİKA, Müsəlman Ağsaqqallar Şurasıdır.

Tədbiri giriş sözü ilə açan Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə Türk Dövlətləri Təşkilatı Dini idarə rəhbərləri Şurasının 7-ci Görüşü çərçivəsində keçirilən, 40-a yaxın ölkəni, 18 beynəlxalq təşkilat və mərkəzi təmsil edən dövlət, din, elm və ictimai xadimi ehtiva edən 200-ə yaxın iştirakçını bir araya gətirən Beynəlxalq Konfransın ərsəyə gəlməsi üçün göstərilən ali himayəyə görə Prezident İlham Əliyevə Konfrans iştirakçıları adından böyük ehtiramla təşəkkürünü ifadə edib.

QMİ-nin sədri bildirib ki, haqq dini olan İslamı insanlara olduğu kimi təbliğ etmək yönündə böyük səylər göstərmiş Seyyid Yəhya Bakuvinin mötədil təsəvvüf fəlsəfəsi, əsasən, mənəvi kamillik, insan qardaşlığı, tolerantlıq və bəşəri həmrəylik prinsiplərinə əsaslanır. Təsadüfi deyil ki, Bakuvinin fəlsəfi irsi UNESCO səviyyəsində qeyd olunub, qlobal əhəmiyyət qazanıb. A.Paşazadənin sözlərinə görə, Bakuvinin fəlsəfi görüşləri Anadoludan Balkanlara, Orta Şərqdən Şimali Afrikaya, Qafqazdan Mərkəzi Asiyaya qədər geniş bir coğrafiyada milyonlarla insana təsir göstərib: "Seyyid Yəhya Bakuvinin Bakıda, İçərişəhərdə yerləşən Şirvanşahlar Saray Kompleksində tarixi abidə kimi qorunan türbəsi həm yerli sakinlərin, həm də xaricdən gələn zəvvarların ziyarət yerinə çevrilib. Zəmanəmizdə olduqca böyük ehtiyac duyulan mötədil dəyərlərin mükəmməl qaynaqlarından olan Bakuvi irsinin tədqiqi və təşviqi, heç şübhəsiz ki, ümumbəşəri və ümumislami dəyər kəsb edir”.

Tədbirdə çıxış edən Türk Dövlətləri Təşkilatının Baş katibi Kubanıçbek Ömüralıyev, Müsəlman Ağsaqqalları Şurasının baş katibi Məhəmməd Əbdülsalam, Dini Qurumlarla İş üzrə Dövlət Komitəsinin sədri Ramin Məmmədov, Azərbaycan Milli Elmlər Akademiyasının prezidenti, akademik İsa Həbibbəyli, İRSİKA-nın Baş direktoru Mahmut Erol Kılıç, UNESCO-nun Tərəfdaşlıq və beynəlxalq əməkdaşlıq sektorunun müdiri Anar Kərimov, Türk Dövlətləri Təşkilatının Müsəlman Dini idarə rəhbərləri Şurasının üzvləri və digər qonaqlar müasir dönəmdə çox aktual olan mötədil İslam nəzəriyyəsinin mötəbər şəxsiyyəti, İslam maarifçiliyinin parlaq nümayəndəsi, mütəfəkkir filosof və şair Seyyid Yəhya Bakuvinin bu gün daha geniş miqyasda dünyaya tanıdılmasının elmi, ictimai və dini mühit üçün son dərəcə önəmli və şərəfli olduğunu diqqətə çatdırıblar. Qeyd olunub ki, bu gün qloballaşma və inteqrasiya proseslərinin geniş vüsət aldığı müasir dünyada separatçılıq və dini radikalizm kimi bəşəriyyəti təhdid edən hadisələrin yaşandığı bir zamanda Bakuvi fəlsəfəsində mötədil İslamın təbliğinə, milli-mənəvi dəyərlərin birləşdirici gücünə və bəşəriyyət üçün vacib olan insan qardaşlığı prinsiplərinin təşviqinə böyük ehtiyac var. Müasir dövr üçün xüsusi əhəmiyyət kəsb edən cəhətlərdən biri də Seyyid Yəhya Bakuvi irsinin yalnız Azərbaycan üçün deyil, bütövlükdə İslam sivilizasiyasının mühüm mənəvi sərvətlərindən biri kimi milli kimliyin, mənəvi suverenliyin və ortaq dini-irfani irsin qorunması baxımından xüsusi əhəmiyyət daşımasıdır.

Beynəlxalq konfransda, həmçinin Türk dünyası üçün önəm kəsb edən “Qardaşlıq və Müttəfiqliyin Zirvəsi” adlı kitab-albom təqdim edilib. Qafqaz Müsəlmanları İdarəsinin sədri şeyxülislam Allahşükür Paşazadənin müəllifi olduğu, iki qardaş xalq, əbədi dost və müttəfiq dövlətin ən yeni tarixində qüdrətli dövlət rəhbərlərinin - Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyevin səyləri və müdrik addımları sayəsində mənəvi irsin, İslam dəyərlərinin qorunub inkişaf etdirilməsi istiqamətində misilsiz fəaliyyətləri əks etdirmək məramı daşıyan nəşr iki dildə - Azərbaycan və özbək dillərində işıq üzü görüb.

Bununla yanaşı, Qafqaz Müsəlmanları İdarəsi tərəfindən hazırlanıb nəşr edilmiş “Piri-sani – Seyyid Yəhya Bakuvi ”, Azərbaycan və ingilis dillərində “İrəvan Qazılığının tarixi” kitablarının və digər nəşrlərin Beynəlxalq Konfrans çərçivəsində təqdimatı keçirilib.

Konfransın materialları əsasında, həmçinin İslamın mötədil İslam dəyərləri – Bakuvi irsinə həsr olunmuş film hazırlanıb.

“İslam dünyasının mədəni irsində Seyyid Yəhya Bakuvi zirvəsi: Mötədil dəyərlər və müasir çağırışlar” mövzusunda Birinci Beynəlxalq konfransın materialları əsasında kitab və broşürlərin nəşri, süni intellekt vasitələri ilə təqdimatların təşkili nəzərdə tutulub.

Sentyabrın 15-də beynəlxalq konfrans işini bölmə iclasları ilə davam etdirəcək.