Bakıda regionda ilk dəfə Azərbaycanın ev sahibliyi edəcəyi Kiberdiplomatiya üzrə beynəlxalq konfrans keçirilir.

AZƏRTAC xəbər verir ki, tədbir Azərbaycan Respublikası Xüsusi Rabitə və İnformasiya Təhlükəsizliyi Dövlət Xidmətinin təşkilatçılığı ilə həyata keçirilir. Konfransın məruzəçiləri, iştirakçıları yerli və xarici qonaqlardır. Diplomatik nümayəndələr, bəzi ölkələrdə yeni diplomatik vəzifəyə çevrilən kibersəfirlər, o cümlədən sahə üzrə qlobal aktorlar diplomatiyanın informasiya təhlükəsizliyindəki rolunu müzakirə etmək üçün Azərbaycanda bir araya gəliblər.

Xüsusi Rabitə və İnformasiya Təhlükəsizliyi Dövlət Xidmətinin rəisi İlqar Musayev Bakıda keçirilən 1-ci beynəlxalq Kiberdiplomatiya konfransında bildirib ki, hazırkı zaman diplomatiya və texnologiya sahələrinin birləşdiyi mühüm dövrdür.

“Kiberdiplomatiyanın yaranması beynəlxalq münasibətləri yenidən formalaşdırır, həm yeni misilsiz imkanlar, həm də təxirəsalınmaz tədbirlər görülməsinə dair çağırışlar edir. Kiberdiplomatiya üzrə ölkəmizdə keçirilən 1-ci beynəlxalq konfransın əsas məqsədlərindən biri kibertəhlükəsizlik sahəsində beynəlxalq əməkdaşlığı daha da qüvvətləndirməkdir. Biz inanırıq ki, kibertəhdidlərlə mübarizə aparmaq, rəqəmsal infrastrukturumuzu möhkəmləndirmək, rəqəmsal sahədə fərdlərin hüquq və şəxsi məlumatlarını qorumaq üçün birgə səmərəli həll yolları tapa bilərik. Əməkdaşlıq vacibdir, çünki heç bir ölkə bu çağırışları təkbaşına həll edə bilməz. Kibertəhdidlər sərhəd tanımır və bir kiberhücumun təsiri, mənşə yerindən asılı olmayaraq, bütün dünyada hiss oluna bilər. Buna görə də müttəfiqliyimizi gücləndirmək, ən yaxşı təcrübələri paylaşmaq və kiberməkanla bağlı məsuliyyətli davranmaq barədə ortaq anlaşma yaratmaq vacibdir”, - deyə İlqar Musayev bildirib.