İyunun 6-da paytaxtdakı “Əjdərbəy”, Təzəpir və digər məscidlərdə Qurban bayramı ilə əlaqədar bayram namazı qılınıb.

AZƏRTAC xəbər verir ki, mərasimdə din xadimləri və paytaxt sakinləri iştirak ediblər.

Təzəpir məscidində bayram namazı Qafqaz Müsəlmanları İdarəsinin sədri, şeyxülislam Allahşükür Paşazadənin imamətliyi ilə qılınıb.

Bayram namazında Ümummilli Lider Heydər Əliyevin və şəhidlərimizin ruhuna dualar edilib, xalqımıza əmin-amanlıq və ruzi-bərəkət arzulanıb.

Ölkənin digər, o cümlədən işğaldan azad olunmuş rayonların məscidlərində də bayram namazı qılınıb.

Paytaxtda qılınan bayram namazı müxtəlif ölkələrdən olan müsəlmanları bir araya gətirib. Bayram namazında yerli vətəndaşlarla yanaşı, şəhərimizin qonaqları da iştirak ediblər.

Pakistan vətəndaşı Əli Saqlain bayram namazından sonradan təəssüratlarını AZƏRTAC-ın müxbiri ilə bölüşüb. Azərbaycana ilk səfəri olduğunu deyən Ə.Saqlain fikirlərinə belə davam edib: "Azərbaycanda, xüsusilə də Bakıda Qurban bayramı ilə əlaqədar bayram namazında iştirak etmək mənə çox xoşdur. Bu mərasimdə iştirak etməklə biz müsəlmanlar olaraq bir və həmrəy olduğumuzu nümayiş etdiririk. Pakistan və Azərbaycanda təşkil olunan bayram namazları arasında bir fərq görmürəm. Hər kəs burada Allaha dualar edir və qurbanlarının qəbul olunmasını diləyir".

Paytaxt sakini Elman Səlimxanov isə ölkəmizdə bayramların bir neçə ildir ki, xüsusi coşqu və sevinclə qeyd edildiyini bildirib: "Azərbaycan xalqının Qurban bayramını təbrik edirəm. Çox şükür ki, artıq bir neçə ildir bayramları azad edilmiş torpaqlarda qeyd etməyə müvəffəq olmuşuq. Buna görə şəhidlərimizə borcluyuq. Bu gün əllərimizi Allah dərgahına qaldırıb xalqımız, bütün müsəlmanlar, dünyamız üçün dualar etdik. Allahdan şəhidlərimizə rəhmət, qazilərimizə şəfa arzuladıq. Uca Yaradan Ali Baş Komandan, Prezident İlham Əliyevi, onun Rəşadətli ordusunu və xalqımızı qorusun. Üçrəngli bayrağımız hər zaman zirvələrdə dalğalansın".