Ailə, Qadın və Uşaq Problemləri üzrə Dövlət Komitəsinin və Türkiyənin Ailə və Sosial Xidmətlər Nazirliyinin birgə əməkdaşlığı çərçivəsində sentyabrın 25-də psixoloqlar üçün “Ailə və nikah institutunu dəstəkləyən əsas mexanizmlər” mövzusunda təlim-seminar başlayıb.

AZƏRTAC xəbər verir ki, psixoloqların peşəkarlığının artırılması məqsədi daşıyan dördgünlük təlimdə 40-a yaxın ailə psixoloqunun iştirakı nəzərdə tutulur. Türkiyənin Ailə və Sosial Xidmətlər Nazirliyinin nümayəndələri tərəfindən seminar iştirakçılarına dörd gün ərzində mövzu ilə bağlı praktiki və nəzəri biliklər veriləcək.

Təlimin açılışında çıxış edən Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva qurumlar arasında imzalanan memorandumun əhəmiyyətindən danışıb, əməkdaşlıq əlaqələrindən söz açıb.

O, ailə institutlarını problemlərdən qorumağın vacibliyinə toxunub, bunun dövlətin əsas prioritetlərindən biri olduğunu qeyd edib.

A. Sofiyeva bildirib: "Prezident İlham Əliyevin rəhbərliyi ilə müzəffər Ordumuzun həyata keçirdiyi lokal xarakterli antiterror tədbirləri uğurlu oldu. Eyni zamanda, BMT Təhlükəsizlik Şurasında Türkiyə Prezidenti Rəcəb Tayyib Ərdoğanın Azərbaycanı müdafiə edən çıxışı iki ölkə arasındakı münasibətlərin yüksək səviyyədə olmasının əyani göstəricisidir".

Qeyd edək ki, təlim-seminar sentyabrın 28-dək davam edəcək.