Dekabrın 6-da Bakıda “Məişət zorakılığının qarşısının alınması: imkanlar və perspektivlər” mövzusunda keçirilən beynəlxalq konfransın ilk günü yekunlaşıb.

AZƏRTAC xəbər verir ki, Ailə, Qadın və Uşaq Problemləri üzrə Dövlət Komitəsinin təşkilatçılığı ilə keçirilən konfransda dövlət və hökumət rəsmiləri, Milli Məclisin deputatları, beynəlxalq təşkilatların və xarici ölkələrin nümayəndələri iştirak ediblər.

Tədbir məişət zorakılığı ilə mübarizəyə həsr olunmuş videoçarxın nümayişi ilə başlanıb.

Konfransda çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova komitəyə hər il təqribən 400-ə yaxın müraciət daxil olduğunu deyib. Qeyd edib ki, hər bir müraciət nəzarətə götürülür, zərər çəkmiş şəxslərə dəstək məqsədilə dövlət orqanları arasında əlaqələndirmə həyata keçirilir.

Bahar Muradova vurğulayıb ki, aparılan genişmiqyaslı məlumatlandırıcı və maarifləndirici tədbirlər məişət zorakılığı hallarının daha çox aşkar edilməsinə təkan verib: “Təkcə Dövlət Komitəsinə məişət zorakılığı ilə bağlı daxil olan müraciətlər son dörd ildə üç dəfə artıb. Belə ki, 2020-ci ildə 178, 2023-cü ilin 11 ayında isə 550 müraciət daxil olub”.

Komitə sədri çıxışında dövlətimizin başçısının 2020-ci il 27 noyabr tarixli Sərəncamı ilə təsdiq edilmiş “Azərbaycan Respublikasında məişət zorakılığı ilə mübarizəyə dair 2020-2023-cü illər üçün Milli Fəaliyyət Planı”nın əhəmiyyətindən də danışıb.

Konfransda çıxış edən elm və təhsil naziri Emin Əmrullayev valideynlər arasında olan konfliktin ailədə uşaqlara təsir etdiyini söyləyib: “Valideynlər arasında olan konflikt uşaqlarda travma yaradır. Ona görə də ailədə baş verən zorakılıq cəmiyyətdə özünü büruzə verir”.

Nazir qeyd edib ki, məktəblərin təhlükəsizliyi baxımından Elm və Təhsil Nazirliyinin ən uğurlu layihəsi “Məktəblinin dostu”dur: “Bu layihənin əhatə dairəsi genişləndirilir. Çünki məktəblərdə xoşagəlməz hallardan sığortalanmamışıq”.

Əmək və əhalinin sosial müdafiəsi naziri Sahil Babayev bildirib ki, məişət zorakılığına ən çox məruz qalan uşaqlar və qadınlardır. Sumqayıtda, Bakıda və Cəlilabadda zorakılıqdan əziyyət çəkənlərə sosial dəstək göstərilir. Ölkədə ailə dəyərlərinin artırılması zorakılığın qarşısının alınmasına böyük kömək ola bilər.

Konfrans panel müzakirələrlə davam edib.

Ali Məhkəmənin Cinayət Kollegiyasının hakimi Ələsgər Novruzov bildirib ki, məişət zorakılığı cinayətin bir növüdür və dünyanın aparıcı dövlətlərində də baş verir.

Ə.Novruzov məişət zorakılığı ilə bağlı 622 nəfər təqsirləndirilən şəxs barəsində işlərin öyrənilməsi nəticəsində müəyyən edilmiş nəticələri də açıqlayıb: “Müəyyən edilib ki, təqsirləndirilən şəxslər əsasən kişilər, zərərçəkmişlər isə qadınlardır. Belə ki, təqsirləndirilən şəxslərdən 94 faizini kişilər (585 nəfər), 6 faizini isə qadınlar təşkil edib”.

Baş Prokurorluğun Daxili işlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin böyük prokuroru Rafael Süleymanov deyib: “Ailə-məişət cinayətlərinin aktuallığını nəzərə alaraq, tərəfimizdən aparılan ümumiləşdirmə zamanı müəyyən edilib ki, 2022-ci ildə qadınlara qarşı 6671 cinayət faktı qeydə alınıb. Ailə-məişət münaqişəsi zəminində baş verən cinayətlərin 1129-da zərərçəkmiş şəxs qadınlar, 244-də isə kişilərdir. Zərərçəkmişlərdən isə 12-si yeniyetmələrdir. Onlardan 3-ü qız, 9-u isə oğlandır”.

O bildirib ki, 2023-cü ildə qadınlara qarşı 5034 cinayət törədilib, onlardan 1396-sı ailə-məişət münaqişəsi zəminində baş verib.

Daxili İşlər Nazirliyinin Yetkinlik yaşına çatmayanlarla profilaktiki işin təşkili şöbəsinin rəis müavini polis mayoru İmran Əliyev 2023-cü ilin 9 ayında “102” qaynar xəttinə 754 min 231 məlumat daxil olduğunu deyib. Bunların 0,9 faizi, yəni 7263-ü məişət zorakılığı, qısqanclıq zəminində olan məlumatlardır.

Polis mayoru bu ilin 9 ayında cinayətlərin ümumi sayının 26 min 778 olduğunu vurğulayıb. O deyib: “Qadınlara qarşı zorakılıqla bağlı cinayətlərin sayı 1848, ailə münaqişəsi və qısqanclıq zəminində isə 955-dir”.

Elm və Təhsil Nazirliyinin Ümumi və məktəbəqədər təhsildə məzmun, tədris və qiymətləndirmə şöbəsinin aparıcı məsləhətçisi Afət Süleymanova bildirib ki, ibtidai sinif dərsliklərində “xeyir və şər”, “yaxşı nədir, pis nədir” mövzuları kiçik həcmli illüstrasiyalarla izah olunur, azyaşlılar maarifləndirilir. Bütün bu məlumatlar uşaqların yaş səviyyələri, inkişaf prosesləri nəzərə alınmaqla tərtib edilir. 9-10-11-ci siniflərdə isə reproduktiv sağlamlıqla bağlı fənlər müəyyən edilib, tədris olunur və bunun metodik vəsaiti işlənilir.

“Biologiya, ədəbiyyat, həyat bilgisi, Azərbaycan dili və Azərbaycan tarixi fənləri üzrə dərsliklərə ailə dəyərlərimiz, ailədaxili mədəniyyət, etik normalar, milli-mənəvi, islami əxlaqımız barədə məlumatlandırıcı mətnlər daxil etmişik”, - deyə Afət Süleymanova vurğulayıb.

Konfrans işini sabah davam etdirəcək.