SABAH.HUB-ın təşkilatçılığı ilə dövlət qurumları və qabaqcıl özəl sektor nümayəndələrinin tərəfdaşlığı ilə “Baku ID-2025” innovasiya festivalı keçirilir.

AZƏRTAC xəbər verir ki, “Jolly Joker Baku” və Daş Salnamə Muzeyində baş tutan builki “Baku ID” tədbiri “The Regional Nexus” mövzusunda təşkil olunub. Bu mövzu Qafqaz, Mərkəzi Asiya, Yaxın Şərq və Şimali Afrika regionları arasında innovativ və texnoloji əməkdaşlığın inkişafına fokuslanır.

“Baku ID-2025” festivalının rəsmi açılışı SABAH.HUB-ın baş icraçı direktoru Rəhim Bayramlının çıxışı ilə baş tutub. Ardınca çıxış edən İdarə Heyətinin üzvü Fərhad Paşayev tədbirin ölkənin innovasiya gündəmində daşıdığı əhəmiyyətini vurğulayıb.

Rəhim Bayramlı açılış çıxışında Azərbaycanın innovasiya gündəliyində yeni bir mərhələyə keçdiyini bildirərək qeyd edib ki, “SABAH.city” layihəsinin inşasına artıq başlanılıb və bu müasir mərkəz “Baku ID-2026” tədbirinə ev sahibliyi edəcək. Bu addım regionun texnoloji inkişafını sürətləndirərək və Azərbaycanı daha da güclü bir innovasiya mərkəzinə çevirəcək.

Süni intellekt, yeni bacarıqlar və gələcəyin işçi qüvvəsinin formalaşdırılması ilə bağlı çıxış edən Azərbaycan Respublikası İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) rəhbəri Fariz Cəfərov 4SİM-in fəaliyyəti barədə məlumat verib. Bildirilib ki, qurum tərəfindən həyata keçirilən layihələr gənclər üçün beynəlxalq forumlarda ən son trendləri və innovasiyaları öyrənmək imkanı yaradır. Eyni zamanda, 4SİM Dünya İqtisadi Forumunun qlobal 4Sİ şəbəkəsinin bir hissəsi olaraq, gələcəyin texnologiyalarını və ictimai siyasətini formalaşdırmağa həsr olunmuş 22 mərkəzdən biridir. 4SİM insan kapitalının inkişafını dəstəkləyən təşəbbüslər irəli sürür və texnoloji biliklərin artırılması, təqdimat hazırlığı kimi sahələrdə təlimlər təşkil edərək gənc mütəxəssislərin yetişdirilməsinə dəstək verir.

“Baku ID-2025” festivalının ən diqqətçəkən hissələrindən biri startap müsabiqələridir. Bu müsabiqələr regionun ən perspektivli və yenilikçi layihələrini ortaya qoymaqla yanaşı, gənc sahibkarlar üçün qlobal investorlarla əlaqə qurmaq və öz ideyalarını reallaşdırmaq üçün mühüm imkanlar yaradır. Festivalda investorlar, startaplar və qonaqları yeni tərəfdaşlıqlar üçün geniş imkanlar, dinamik şəbəkələşmə mühiti və real əməkdaşlıqların qurulduğu məhsuldar görüşlər gözləyir. Tədbirdə 32-dən artıq yerli və xarici investor, 75-dən artıq yerli və beynəlxalq startap, 4000-dən artıq iştirakçı və 21-dən artıq tərəfdaş yer alır. Tədbir, həmçinin istedadlı tələbələr üçün də əhəmiyyətli imkanlar yaradır.

Qeyd edək ki, “Baku ID-2025” tədbiri Elm və Təhsil Nazirliyi, SOCAR, “PAŞA Holdinq” və 4SİM kimi aparıcı qurumların tərəfdaşlığı ilə keçirilir. Bu dəstək sayəsində Baku ID artıq yalnız regional deyil, habelə beynəlxalq miqyasda tanınan innovasiya arenasına çevrilməkdədir.