Sentyabrın 6-da Türkiyənin "Fintech Innovation Hub" şirkətinin təşkilatçılığı, Azərbaycan Fintex Assosiasiyası və Türkiyə Ödəniş və Elektron Pul Təşkilatları Birliyinin tərəfdaşlığı ilə Bakıda ilk dəfə Azərbaycan-Türkiyə Fintex Forumu keçirilib.

AZƏRTAC xəbər verir ki, forumun məqsədi Azərbaycan və Türkiyə fintex ekosistemlərinin iştirakçıları arasında işgüzar əlaqələrin gücləndirilməsi, potensial əməkdaşlıq imkanlarının dəyərləndirilməsi, həmçinin iki qardaş ölkə arasında digər sahələrdə olduğu kimi innovativ maliyyə texnologiyaları sahəsində də effektiv sinerjinin yaradılmasıdır.

Azərbaycan Fintex Assosiasiyasının İdarə Heyətinin sədri Ruslan Talıbov bildirib ki, cari ilin birinci yarısında dünyada “Fintex” sahəsində 52 milyard dollar məbləğində investisiya edilib. Hesabat dövründə 2154 sövdələşmə reallaşıb. Dünyada fintex sahəsində əhəmiyyətli məsələlərdən biri də onun gətirdiyi risklərdir. Bu riskləri nəzərə almaq üçün dünyada və regionumuzda addımlar atılır. "Azərbaycan bazarı və bu bazarın timsalında MDB ölkələri bazarı Türkiyə fintexləri üçün kifayət qədər maraq kəsb edəcək. Azərbaycan bazarı Türkiyə fintexlərinə MDB ölkələri bazarlarına çıxış verəcək, eləcə də Azərbaycan fintexləri üçün Türkiyə bazarı xüsusi əhəmiyyət daşıyır", - deyə R.Talıbov qeyd edib.

Azərbaycan Mərkəzi Bankının Ödəniş sistemləri və hesablaşmalar departamentinin direktoru Kəmalə Qurbanova diqqətə çatdırıb ki, bu il avqustun 1-nə ölkədə dövriyyədə olan ödəniş kartlarının sayı keçən ilin analoji dövrü ilə müqayisədə 20 faiz artaraq 15 milyonu ötüb. Hesabat dövründə ölkə daxilində bu kartlarla aparılan nağdsız ödənişlərin həcmi 2 dəfə artaraq 24 milyard manata çatıb: "Ölkə daxilində kart ödənişlərində nağdsız dövriyyənin xüsusi çəkisi ötən ilin eyni dövrünə nisbətən 12,3 faiz bəndi artaraq 53 faizə bərabər olub. Daha bir maraqlı göstərici isə bu gün pos-terminallarda aparılan hər 4 əməliyyatdan birinin token əməliyyatı, yəni mobil telefonlar və ya digər ağıllı cihazlar vasitəsilə olmasıdır. Bu isə Azərbaycan əhalisinin innovasiyalara açıq olduğunu göstərir".

“Azərbaycan Mərkəzi Bankı Beynəlxalq Maliyyə Korporasiyası ilə birlikdə 2024-2028-ci illər üçün fintex strategiyası hazırlayır. Mərkəzi Bank, həmçinin "McKinsey" təşkilatı ilə həyata keçirdiyi maliyyə sektorunun davamlı inkişafı layihəsinin tərkib hissəsindən biri də məhz fintexlərdir: "Bütün bu tədbirlər ölkədə fintexlərə olan tələbin və təklifin artırılmasına, inkişafı üçün zəruri olan yeni rəqəmsal qabiliyyətli kadrların hazırlanmasına da dəstək olacaq", - deyə Kəmalə Qurbanova vurğulayıb.

Forumun təşkilatçısı “Fintex İnnovation Hub” şirkətinin təsisçisi Kutay Yalınkılıç deyib: “Hazırda Türkiyə 76 fintex şirkəti lisenziyalı olaraq fəaliyyət göstərir. Yaxın zamanda lisenziyalı şirkətlərin sayı 100-ə çatacaq. Türkiyədəki fintex şirkətləri 10 illik təcrübəyə malikdir. Bu şirkətlər ödəmə xidmətləri, elektron pul köçürmələri əməliyyatlarını həyata keçirir. Bizim məqsədimiz Türkiyədəki bu təcrübələri həm tənzimləyərək, həm də tətbiq edərək Azərbaycan və digər ölkələrdəki fintex şirkətləri arasında əlaqə yaratmaqdan ibarətdir”.

Çıxış edənlər Türkiyə və Azərbaycanın maliyyə texnologiyaları sahəsində ən son yeniliklər barədə fikirlərini bölüşüblər.

Fintexlərlə yanaşı, yerli və xarici maliyyə institutlarının nümayəndələrinin iştirak etdiyi forumda hər iki ölkənin aparıcı ekspertləri fintex ekosistemlərinin cari vəziyyəti və inkişaf trendləri, yeni çağırışlar, beynəlxalq ödəniş həllərindən "Buy Know Pay Later" modellərinə, rəqəmsal ödəniş sistemlərindən maliyyə təhlükəsizliyinə, süni intellektdən blokçeyn texnologiyalarına qədər bir çox mövzuda çıxışlar edib və müzakirələr aparıblar.

Forum panel iclaslarla işini davam etdirib.