Səhiyyə Nazirliyinin dəstəyi və Azərbaycan Pediatriya Cəmiyyətinin təşkilatçılığı ilə “Yaşıl dünya naminə həmrəylik ili” çərçivəsində III Milli Pediatriya Konqresi keçirilir.

AZƏRTAC xəbər verir ki, konqresin açılış mərasimində çıxış edən Azərbaycan Pediatriya Cəmiyyətinin sədri Erkin Rəhimov sosial mövzulara daha çox yer verilməsinin əhəmiyyətindən danışıb. O, Azərbaycan Pediatriya Cəmiyyətinin fəaliyyəti haqqında konqres iştirakçılarına ətraflı məlumat verib.

Səhiyyə nazirinin müavini Nadir Zeynalov qeyd edib ki, uşaqların sağlamlığının qorunması hər bir ölkə üçün prioritet məsələdir: “Milli pediatriyanın qarşısında müxtəlif çağırışlar var. Ana və uşaq ölümünün azaldılması, uşaqların psixi sağlamlığının qorunması, gələcəkdə uşaqlarda yarana biləcək problemləri vaxtında aşkar etmək bizim qarşıya qoyduğumuz əsas hədəflərdir. Digər problem isə iqlim dəyişikliyinin və ekoloji problemlərin uşaq sağlamlığına təsirləridir. Düşünürəm ki, konqresdə bu məsələlər müzakirə ediləcək”.

Tibbi Ərazi Bölmələrini İdarəetmə Birliyinin (TƏBİB) Tədqiqatlar və protokolların tətbiqi şöbəsinin müdiri Kəmalə Ağayeva təmsil etdiyi qurum tərəfindən pediatriya sahəsinə xüsusi önəm verildiyini diqqətə çatdırıb: “TƏBİB uşaqlarda xəstəliklərin diaqnozu, müalicəsi, peyvəndlənməsi sahələrində daha aktiv fəaliyyət göstərməyə çalışır. Bizim əsas hədəfimiz uşaqlar üçün sağlam gələcək yaratmaqdır”.

Daha sonra Azərbaycan Tibb Universitetinin prorektoru Məlahət Sultanova, Beynəlxalq Pediatriya Assosiasiyasının icraçı direktoru Aman Puulunqan çıxış ediblər.

Qeyd edək ki, 3 gün davam edəcək konqresdə pediatrik dermatologiya, pediatriyada tez-tez rast gəlinən qidalanma problemləri, pediatriyada ekstrakorporal müalicələr mövzuları müzakirə edilib. Konqres çərçivəsində keçirilən kurslarda 300-dək həkim-pediatr iştirak edir.