Fevralın 24-də Bakıda Azərbaycan Endouroloji Cəmiyyəti və Türk Endouroloji Dərnəyinin təşkilatçılığı ilə I Azərbaycan Endouroloji Simpoziumu keçirilir.

AZƏRTAC xəbər verir ki, tədbir Azərbaycan Respublikasının Dövlət Himninin səsləndirilməsi ilə başlayıb.

I Azərbaycan Endouroloji Simpoziumunu giriş sözü ilə açan Azərbaycan Milli Elmlər Akademiyasının müxbir üzvü, Azərbaycan Respublikasının Əməkdar elm xadimi, tibb elmləri doktoru, professor Südeyif İmamverdiyev bildirib ki, müasir dünyada tibbi texnologiyaların sürətlə inkişafı səhiyyə sahəsinə də öz müsbət təsirlərini göstərir.

Sonra Azərbaycan Endouroloji Cəmiyyətinin sədri, tibb elmləri doktoru, professor Rauf Nağıyev çıxış edərək tədbir iştirakçılarına Azərbaycan Endouroloji Cəmiyyətinin məqsədi və gələcək planları barədə məlumat verib.

Tədbirdə Azərbaycanla yanaşı, qardaş Türkiyədən də urologiya sahəsində çalışan aparıcı mütəxəssislər iştirak ediblər. Simpoziumda professor G.Atış, professor M.Arslan, tibb elmləri doktoru F.Quliyev, tibb elmləri doktoru R.Şolan, dosent K.Ö.Günseren, dosent F.Əhmədov, dosent R.Məmmədov, tibb üzrə fəlsəfə doktoru E.Mustafayev, həmçinin tanınmış mütəxəssislər Z.Həşimov, B.Xalıqov, P.Hacıyevin “Urinar sistemin daş xəstəliyində laparoskopik cərrahiyyənin yeri”, “3D laparoskopiyanın üstünlükləri”, “Böyrək transplantasiyasında endouroloji yanaşmalar”, “Prostat xərçənginin cərrahi müalicəsində laparoskopik ekstraperitoneal radikal prostatektomiya və genişləndirilmiş limfa düyünlərinin disseksiyası”, “Sıfır işemiya ilə laparoskopik parsiyal nefrektomiya: kimə, necə?”, “RİRS və URS fəsadları və onların aradan qaldırılma yolları”, “Supin PNL, üstünlükləri və çatışmazlıqları”, “PNL sonra əmələ gələn fəsadların müalicəsi”, “Laparoskopik sağ və sol adrenalektomiyanın mərhələləri”, “BPH cərrahi müalicəsində HOLEP: qızıl standart dəyişirmi?”, “Prostat cərrahiyyəsində müasir azinvaziv yanaşmalar”, “Uşaqlarda PNL”, “Uşaqlarda anadangəlmə qüsurların mini invaziv diaqnostika və müalicəsi” mövzularında məruzələri dinlənilib.

Simpoziumda qeyd olunan mövzularda məruzələr üzrə endourologiyanın aktual problemləri, müasir dövrdə uroloji xəstəliklərin müalicəsində tətbiq edilən yeniliklər müzakirə olunub, geniş təcrübə mübadiləsi aparılıb, elmi–tədqiqat işlərinin təqdimatının əhəmiyyəti vurğulanıb.

Üç sessiyadan ibarət olmaqla, 150-dən çox professor, müəllim, həkim, rezident, tələbənin iştirakı ilə keçirilən simpozium bu gün öz işini başa vuracaq.

Simpozium müzakirələrlə davam etdirilir.