“Heydə Əliyev İli” çərçivəsində Milli Arxiv İdarəsi tərəfindən təsdiq edilmiş tədbirlər planına uyğun olaraq, silsilə xarakterli tədbirlərin həyata keçirilməsi davam etdirilir.

AZƏRTAC xəbər verir ki, dekabrın 1-də Ulu Öndər Heydər Əliyevin 100 illiyi münasibətilə reallaşan "Heydər Əliyev və Azərbaycanda arxiv işi" mövzusunda seminarda dövlət arxivlərinin komplektləşdirmə mənbəyi olan idarə, müəssisə və təşkilatların arxiv işlərinə məsul əməkdaşları iştirak edirlər.

Tədbirdə əvvəlcə Ulu Öndərin və torpaqlarımızın azadlığı uğrunda şəhid olmuş qəhrəmanlarımızın əziz xatirəsi bir dəqiqəlik sükutla yad olunub. Sonra Heydər Əliyevin 100 illiyinə həsr olunmuş videoçarx izlənilib.

Milli Arxiv İdarəsinin rəisi Əsgər Rəsulov Ulu Öndərin dövlət quruculuğu sahəsində misilsiz xidmətləri haqqında məlumat verib. O qeyd edib ki, Sovet Azərbaycanına rəhbərliyi dövründə daim xalqının milli maraqlarını bütün çətinliklərə baxmayaraq qoruyan Heydər Əliyev müstəqillik illərində dövlətin parçalanmasının qarşısını alıb, onun stabil inkişafının dönməzliyini təmin edib.

“Heydər Əliyev və Azərbaycanda arxiv işi” mövzusunda Milli Arxiv İdarəsinin rəis müavini Həsən Həsənov məruzə ilə çıxış edərək Ulu Öndərin respublikada, o cümlədən keçmiş SSRİ-də arxiv işinin inkişafında oynadığı roldan danışıb. Bildirilib ki, məhz Heydər Əliyevin Fərmanı əsasında Azərbaycan Respublikasında Milli Arxiv İdarəsi yaradılıb, dövlət arxivlərinin maddi-texniki təminatının gücləndirilməsi istiqamətində işlər görülüb.

Məruzə ilə çıxış edən Milli Arxiv Fondunun Sənədlərinin komplektləşdurməsi, qeydiyyat və idarə arxivləri ilə iş şöbəsinin müdiri Cəmaləddin Cavadov Milli Arxiv Fondu sənədlərinin dövlət arxivlərinə qəbulu, qeydiyyatı və idarə arxivlərində işin təşkili haqqında məlumat verib.