Oktyabrın 21-də Azərbaycan Respublikasının insan hüquqları üzrə müvəkkili Səbinə Əliyevanın təşkilatçılığı ilə “Biznes və insan hüquqları sahəsində Milli Fəaliyyət Planının hazırlanması istiqamətində əməkdaşlığın gücləndirilməsi” mövzusunda dəyirmi masa keçirilib.

AZƏRTAC xəbər verir ki, tədbirdə Ombudsman Aparatının rəhbəri Aydın Səfixanlı çıxış edərək biznes fəaliyyətinin insan hüquqlarına təsirinin həm müsbət, həm də bəzi hallarda mənfi xarakter daşıya bildiyini söyləyib. O qeyd edib ki, biznesin inkişafı və sahibkarlığın dəstəklənməsi hər bir inkişaf etmiş və inkişaf etməkdə olan dövlətin əsas prioritetlərindən biridir. Azərbaycan dövləti tərəfindən bu istiqamətdə səmərəli qanunvericilik və institusional mexanizmlər formalaşdırılıb, biznes mühitinin daha da yaxşılaşdırılması üçün ardıcıl tədbirlər həyata keçirilir.

Aydın Səfixanlı vurğulayıb ki, dövlətin məqsədi yalnız iqtisadi inkişafı təmin etmək deyil, həm də insan hüquq və azadlıqlarının müdafiəsini təmin etməkdir. Bu baxımdan, biznes strukturlarının da fəaliyyətləri zamanı insan hüquqlarının qorunmasına xüsusi diqqət yetirməsi vacibdir. O əlavə edib ki, hazırda dünyanın aparıcı şirkətləri ictimaiyyətə təqdim etdikləri hesabatlarda insan hüquqlarının qorunması, əməkdaşlarının hüquqlarının təminatı, eləcə də ətraf mühitə təsirlərlə bağlı məlumatları açıqlayırlar.

Müvəkkilin aparat rəhbəri qeyd edib ki, biznes fəaliyyəti zamanı əmək hüquqları, sağlam ətraf mühitdə yaşamaq hüququ, qadın və uşaq hüquqları kimi bir çox fundamental insan hüquqlarına təsir göstərilə bilər. Bu baxımdan, BMT çərçivəsində uzun illərdir aparılan araşdırmalar və qəbul edilən beynəlxalq sənədlər mühüm əhəmiyyət daşıyır. 2011-ci ildə BMT tərəfindən “Biznes və İnsan Hüquqları sahəsində Rəhbər Prinsiplər” qəbul olunub və bu prinsiplərin üzv dövlətlərdə tətbiqi ilə bağlı tövsiyələr verilib. Bir çox ölkələr kimi Azərbaycan da bu prinsiplərin həyata keçirilməsinə xüsusi önəm verir.

Aydın Səfixanlı bildirib ki, BMT səviyyəsində biznes və insan hüquqları üzrə milli fəaliyyət proqramlarının hazırlanması ilə bağlı ümumi təlimat hazırlanıb. Sözügedən təlimatda bu proqramların əsas məqsəd və istiqamətləri, qarşıya qoyulan vəzifələr və həyata keçirilməsi mexanizmləri əksini tapıb. Azərbaycanın da bu istiqamətdə Milli Fəaliyyət Planının hazırlanması prosesinə start verilməsi bu sahədə əməkdaşlığın daha da möhkəmlənməsinə xidmət edir.

Tədbirdə dövlət qurumlarının, beynəlxalq təşkilatların, eləcə də özəl sektorun nümayəndələri iştirak ediblər.