Martın 15-də Akademik Zərifə Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin birgə təşəbbüsü ilə Beynəlxalq “Qlaukoma həftəsi” çərçivəsində Azərbaycan qlaukomatoloqlarının V elmi-praktik konfransı keçirilir.

AZƏRTAC xəbər verir ki, konfransda qlaukomanın müasir diaqnostik təhlili, onun müalicəsi barədə danışılır, xəstəliklərin aradan qaldırılması ilə bağlı fikir mübadiləsi aparılır.

Akademik Zərifə Əliyeva adına Milli Oftalmologiya Mərkəzinin direktoru, AMEA-nın müxbir üzvü, Əməkdar elm xadimi, t.e.d., professor Elmar Qasımov konfransı açaraq bildirib ki, tədbirin keçirilməsində məqsəd digər ölkə, region və mərkəzin həkimlərini oftalmologiya sahəsində baş verən yeniliklər barədə xəbərdar etmək, yeni təkliflər irəli sürmək və bununla yanaşı, həkimlərin də bu yeniliklərdən istifadə etməsinə dəstək olmaqdır.

Konfransda “Zədə ilə əlaqəli qlaukomanın xüsusiyyətləri yaşlı nəsil nümayəndələrində”, “Qlaukomanın diaqnostikasında optik koherens tomoqrafiyanın imkanları”, “Vitreoretinal cərrahiyyə sonrası gözdaxili təzyiqin artması səbəbləri və onlara yanaşma taktikası”, “Toksik konyunktivit”, “Azərbaycanda buynuz qişanın transplantasiyasından sonra yaranan ikincili qlaukoma” və s. mövzularında çıxışlar dinlənilir. Tədbirdə Azərbaycan oftalmoloqları ilə yanaşı, Türkiyədən gələn həkimlər də iştirak edir.

Konfrans öz işini müzakirələrlə davam etdirir.