“Onkoloji xəstəliklər bütün dünyada səhiyyənin ən aktual problemlərindən biri olaraq qalır”.

AZƏRTAC xəbər verir ki, bunu Milli Onkologiya Mərkəzinin Nüvə təbabəti və radionuklid terapiya şöbəsinin müdiri Fuad Novruzov 5-ci Azərbaycan Onkologiya və Nüvə Təbabəti Simpoziumunda jurnalistlərə açıqlamasında deyib.

O qeyd edib ki, Azərbaycanda onkoloji xəstəliklərin müalicəsi istiqamətində böyük addımlar atılır: “Hazırda Milli Onkologiya Mərkəzi maddi-texniki bazasını yeniləməklə yanaşı, öz kadr potensialını da inkişaf etdirir. Eyni zamanda, Mərkəzin onkoloji xəstəliklər istiqamətində keçirdiyi elmi tədbirlər yerli mütəxəssislərin təkmilləşdirilməsi baxımından vacibdir.

5-ci Azərbaycan Onkologiya və Nüvə Təbabəti Simpoziumunun aktual onkoloji problemlərin, yeni innovativ həllərin müzakirə edilməsi istiqamətində vacib platforma olduğunu düşünürəm”.

Mütəxəssis onkoloji xəstəliklərlə mübarizədə əhalinin maarifləndirilməsinin önəmini vurğulayıb: “Əhali bilməlidir ki, xərçəng ağır xəstəlikdir, lakin məğlubedilməz deyil. Burada əsas məsələ, onkoloji xəstəliyin erkən aşkarlanması və müalicəsidir. Hər kəsə ildə bir dəfə ümumi həkim müayinəsindən keçməsini tövsiyə edirəm”.