Avropa İttifaqının (Aİ) Azərbaycandakı nümayəndəliyi ilə Gənc Avropa Səfirləri Bakıda "Yaşıl Gələcək” şüarı altında Avropa Gənclər Müsabiqəsinin dördüncü buraxılışını təşkil ediblər.

AZƏRTAC xəbər verir ki, tədbir Avropa İttifaqı tərəfindən maliyyələşdirilən "Planetimiz naminə" kampaniyası çərçivəsində həyata keçirilib.

Aİ-nin Azərbaycandakı səfiri Peter Mixalko bərpaolunan enerji və yaşıl siyasət sahəsində qlobal lider olan Avropa İttifaqının Azərbaycan gənclərinin ideyalarını dəstəklədiyini qeyd edib: “Bu gün gənclərdən öyrənmək və onların ətrafımızı əhatə edən real dayanıqlılıq çağırışlarına yönəlmiş dəyərli həll yollarını kəşf etmək bizim üçün böyük həyəcan doğurur. Mənim üçün tam aydındır ki, bu komandaların innovativ yanaşmaları Azərbaycanın və planetimizin gələcəyi üçün böyük ümid yaradır. Çəkdikləri zəhmətə və parlaq ideyalarına görə bütün komandalara təşəkkür edirəm".

“Yaşıl Gələcək” müsabiqəsinə Ağdaş, Bakı, Xankəndi, İsmayıllı, Lənkəran və Şəmkirdən olan 512 nəfərin təmsil olunduğu 128 komanda qatılıb.

Hər biri dörd üzvdən ibarət olan dörd komanda isə final mərhələsinə yüksəlib.

Müsabiqənin sonunda qaliblər mükafatlandırılıb.

“Times New Roman" komandası birinci, "Green Innovators" komandası ikinci, "Sustainable energy " komandası üçüncü, "Voyage" komanda isə dördüncü yerləri tutublar.