Oktyabrın 17-də Azərbaycan Beynəlxalq Qarabağın Bərpa, Yenidənqurma və İnkişafı “Rebuild Karabakh”, 28-ci Azərbaycan Beynəlxalq İnşaat “BakuBuild” və 15-ci Yubiley Beynəlxalq İstilik, Havalandırma, Kondisionerləşdirilmə, Su təchizatı, Santexnika və Üzgüçülük Hovuzu “Aquatherm Baku” sərgilərini birləşdirən “Xəzər İnşaat Həftəsi”nə həsr olunmuş mətbuat konfransı keçirilib.

AZƏRTAC xəbər verir ki, konfransda çıxış edən Qarabağ Dirçəliş Fondunun (QDF) rəsmisi Pərvin Bağırova fond tərəfindən həyata keçirilən layihələrdən söz açıb. Bildirilib ki, 2024-cü ildə QDF-nin xətti ilə Qarabağa virtual səfər də təşkil ediləcək.

“Xəzər İnşaat Həftəsi”nin layihə rəhbəri Rəşad Qədimov oktyabrın 19-dan 21-dək keçiriləcək sərgilərin miqyasının bu il daha da genişləndiyini deyib. Onun sözlərinə görə, sərgidə 23 ölkədən 391 şirkət iştirak edəcək. Bu ötən illə müqayisədə 20 faiz artım deməkdir. Sərgidə Türkiyə şirkətləri çoxluq təşkil edəcək.

Qeyd olunub ki, sərginin əsas məqsədi Qarabağda baş verən müsbət dəyişikliklərə diqqəti artırmaqla yanaşı, Qarabağın bərpası proseslərinə təşkilatları və müəssisələri cəlb etməkdir. Sərgi iştirakçıları arasında həm Azərbaycan, həm də xarici şirkətlər təmsil olunacaq. Bununla da, Qarabağ üçün investisiyaların həcmini artırmaq, xarici şirkətlərin Qarabağın inkişafında, infrastrukturunun bərpasında, mülki obyektlərin tikintisində iştirak etməsini təmin etmək mümkün olacaq. “Rebuild Karabakh” sərgisi ekologiya, energetika, informasiya texnologiyaları, kənd təsərrüfatı, mədənçilik, nəqliyyat, qida sənayesi, sağlamlıq, enerjiyə qənaət sistemləri, ağıllı ev həlləri, təhlükəsizlik, təhsil, turizm və mədəni irs, eləcə də yol tikintisi və infrastrukturu bölmələri üzrə təşkil ediləcək.

Sərgilərdə Azərbaycan, Almaniya, Belarus, Birləşmiş Ərəb Əmirlikləri, Cənubi Koreya, Çexiya, Çin, Fransa, Böyük Britaniya, Niderland, Finlandiya, İspaniya, İtaliya, Qazaxıstan, Macarıstan, Özbəkistan, Rusiya Federasiyası, Sloveniya, Türkiyə, İran İslam Respublikası, Hindistan və digər ölkələrdən olan şirkətlər yer alacaq. Sərgilərdə Almaniya, Macarıstan, Özbəkistan və Rusiya Federasiyası milli və regional stendlərlə təmsil olunacaq.