Ailə, Qadın və Uşaq Problemləri üzrə Dövlət Komitəsinin Qeyri-Hökumət Təşkilatlarına Dövlət Dəstəyi Agentliyi ilə əməkdaşlığı çərçivəsində Bakıda “Uşaq hüquqları naminə şəffaflıq və rəqəmsal islahatlar” mövzusunda konfrans keçirilir.

AZƏRTAC xəbər verir ki, tədbirin məqsədi açıq hökumət prinsiplərinin təşviqi, dövlət idarəçiliyində şəffaflığın artırılması, uşaqların rəqəmsal xidmətlərdə iştirak imkanlarının genişləndirilməsi, bu sahədə mövcud vəziyyətin və qarşıda duran vəzifələrin müzakirəsindən ibarətdir.

Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva bildirib ki, son illər qəbul olunan qanunvericilik aktları, strategiyalar və konseptual sənədlər bu istiqamətdə sistemli dövlət siyasətinin formalaşdığını nümayiş etdirir.

Sədr müavini bildirib ki, Komitə tərəfindən 2023-cü ildə uşaqların internetdən istifadə səviyyəsinə dair genişmiqyaslı araşdırma aparılıb və nəticələr gələcək fəaliyyətin planlaşdırılmasında mühüm rol oynayır. Uşaqlarla işləyən mütəxəssislərin bilik və bacarıqlarının artırılması məqsədilə mütəmadi təlimlər təşkil edilir, beynəlxalq ekspertlərin iştirakı ilə zərərli informasiyadan qorunma mövzusunda müzakirələr keçirilir.

Aynur Sofiyeva məlumat bankının yaradılması istiqamətində işlərin yekunlaşmaq üzrə olduğunu da diqqətə çatdırıb. Qeyd edib ki, bu sistem uşaqlar haqqında şəxsi məlumatların və statistik göstəricilərin toplanması, saxlanması və emalı üçün əhəmiyyətli resurs olacaq və aidiyyəti qurumların koordinasiyalı fəaliyyətini gücləndirəcək.

Tədbirdə çıxış edən Qeyri-Hökumət Təşkilatlarına Dövlət Dəstəyi Agentliyinin Layihələrin idarə edilməsi departamentinin müdiri Elnur Bağırlı diqqətə çatdırıb ki, Agentlik tərəfindən 2020-2025-ci illərdə uşaq hüquqlarının müdafiəsi ilə bağlı ümumilikdə 65 layihəyə dəstək verilib. Həmin layihələr təkcə paytaxtda deyil, Azərbaycanın demək olar ki, bütün regionlarında həyata keçirilib. Layihələr uşaq hüquqlarının müdafiəsi, sağlamlığın qorunması, təhsil imkanlarının yaxşılaşdırılması, təhsildən yayınmanın qarşısının alınması, sosial reabilitasiya və inteqrasiya mövzularını əhatə edib.