Azərbaycan paytaxtında regionun rəqəmsallaşması sahəsində ilin əsas hadisələrindən biri - “SAP Discovery Day Baku” forumu işə başlayıb.

AZƏRTAC xəbər verir ki, tədbiri giriş sözü ilə açan “Multi-country SAP” klasterinin direktoru Aleksandr Meteçko “SAP Discovery Day Baku” forumunda yeni tendensiyaların, biznes proseslərin transformasiyaya yanaşmalarının və müxtəlif layihələrin icrası təcrübəsinin müzakirə olunacağını qeyd edib. Azərbaycanın və digər ölkələrin 300-dən artıq aparıcı şirkətinin rəhbər və mütəxəssisləri tədbirdə iştiraka dəvət olunub. “Dəyişən bazar şəraitində biznesinizi daha da effektli etməkdən ötrü ən yaxşı strategiyalarla və təcrübələrlə tanış olmaq fürsətini əldən buraxmayın”, - deyə A.Meteçko əlavə edib.

“SAP AZ”ın Baş direktoru Anar Əliyev iştirakçıları forumun tarixi, rəhbərlik etdiyi şirkətin fəaliyyəti ilə tanış edib. O, rəqəmsallaşma və şirkətlərin inkişaf təcrübəsi, o cümlədən “SAP S/4HANA” flaqman həllər bazasında təcrübəsi ilə bölüşən “SAP” müştərilərinin çıxışının, eləcə də müştəri təcrübəsində, logistikada, maliyyədə, texniki xidmətdə, personalda və digər proseslərdə idarəetmənin aktual məsələlərinə toxunan müxtəlif biznes istiqamətlərinin liderləri ilə canlı diskussiyaların aparılacağının, eləcə də regionda biznesin inkişaf perspektivləri, “SAP”ın yaratdığı və təqdim etdiyi son innovasiyalar barədə ekspertlərin şərhlərinin tədbirin gündəliyinə daxil edildiyini bildirib.

Çıxışlardan sonra forum “SAP S/4 HANA” rəqəmsal platformasının üstünlükləri və xüsusiyyətləri” mövzusunda plenar diskussiya ilə işini davam etdirib. Sessiyanın moderatoru qismində “SAP” xidmətlərinin satışı üzrə rəhbər Yevgeni Kuprin, spikerlər qismində isə “Azerfloat” Qapalı Səhmdar Cəmiyyətinin icraçı direktoru Emil Həsənov, “Veyseloglu” şirkətinin rəqəmsal transformasiya departamentinin direktoru Özgür Kakmaçı, “Azersun Holding”in baş icraçı direktoru Hakan Figenli, “TerraLink”in “Mərkəzi Asiya və Azərbaycan” klasterinin direktoru Eldar Bilalov çıxış ediblər.