Yanvarın 13-də Big Group Sağlamlıq Turizm şirkəti tərəfindən “Qastroenterologiya və Hepatologiya sahəsində müasir klinik tövsiyələr” adlı elmi praktik konfrans keçirilir.

AZƏRTAC xəbər verir ki, “Cərrahi koloproktologiya və qaraciyər problemləri”, “Mədə və nazik bağırsaq patologiyası”, “Qaraciyər sirrozları”, “Hepatologiyanın aktual yenilikləri (2022-2023 illər)” və “Advans endoskopiya və cərrahiyyə” adı altında beş sessiya üzrə təşkil edilən konfransda mövzu üzrə çıxışlar edilir, mühazirələr dinlənilir, fikir mübadiləsi aparılır.

Təlim-konfransda yerli həkimlərlə yanaşı, Türkiyədən olan professorlar Ümit Koç və Ayhan Dinçkan tərəfindən mövzu ilə bağlı çıxışlar edilir.

İkigünlük konfrans Azərbaycan Respublikasının Səhiyyə Nazirliyi, İcbari Tibbi Sığorta üzrə Dövlət Agentliyi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Tibbi Ərazi Bölmələrini İdarəetmə Birliyi, İctimai Səhiyyə və İslahatlar Mərkəzi, Azərbaycan Qastroenteroloqlar və Hepatoloqlar İctimai Birliyi, Azərbaycan Qastroenterologiya İnvaziv Endoskopiya Cəmiyyəti, DİAMED Holdinq, İstinye Universiteti Bahçeşehir Liv Xəstəxanası, Acibadem Hospital ilə əməkdaşlıq çərçivəsində həyata keçirilir.