İyunun 16-da “Baku Crystal Hall”da “Partners and Business Baku 2022” - yerli şirkətlərin tanıtım sərgi-konfransı öz işinə başlayıb.

AZƏRTAC xəbər verir ki, sərgi Kiçik və Orta Biznesin İnkişafı Agentliyi (KOBİA), Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi, Azərbaycan Sahibkarlar (İşəgötürənlər) Təşkilatları Milli Konfederasiyası və “Marsol” MMC-nin birgə təşkilatçılığı, “Kapital Bank”ın tərəfdaşlığı ilə reallaşıb.

Təşkil olunmuş sərgidə sənaye, kənd təsərrüfatı, qida, İKT, təhsil, inşaat, logistika, tekstil və digər sahələrdə fəaliyyət göstərən 200-ə yaxın yerli şirkətin məhsul və xidmətləri təqdim olunur.

Açılış mərasimində iqtisadiyyat nazirinin müavini Niyazi Səfərov, KOBİA-nın İdarə Heyətinin sədri Orxan Məmmədov, Dövlət Məşğulluq Agentliyinin sədri Mustafa Abbasbəyli, Azərbaycan Sahibkarlar (İşəgötürənlər) Təşkilatları Milli Konfederasiyasının vitse-prezidenti Vüqar Zeynalov, İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidmətinin sədri Məmməd Abbasbəyli, “Marsol” MMC-nin sədri Tural Mustafayev və özəl sektorun təmsilçiləri çıxış edərək sərginin əhəmiyyətindən, ölkə iqtisadiyyatının inkişafına verəcəyi töhfədən söz açıblar.

Qeyd olunub ki, Azərbaycan şirkətlərinin daha geniş tanıdılması, bazarlara çıxış imkanlarının genişləndirilməsi, yerli şirkətlər arasında biznes tərəfdaşlığının inkişaf etdirilməsi və yeni əməkdaşlıq əlaqələrinin qurulması məqsədi daşıyan sərgidə sənaye, kənd təsərrüfatı, qida, İKT, təhsil, inşaat, logistika, tekstil və digər sahələrdə fəaliyyət göstərən 200-ə yaxın şirkətin məhsulları nümayiş olunur.

Sərgi-konfrans öz işini “Əmək münasibətləri və məşğulluq altsistemi” - ƏMAS platformasının təqdimatına dair panellə davam etdirib.

Növbəti günlər konfrans çərçivəsində “Dövlətin sahibkarlığın inkişafında mövcud dəstəkləri və perspektivlər”, “Sahibkarların maliyyə kanallarına çıxış imkanları” və “Regionlarda xüsusilə işğaldan azad edilmiş ərazilərdə sahibkarlıq və investisiya perspektivləri” mövzularında panel müzakirələr keçiriləcək.

Sərgidə ziyarətçi qismində iştirak ödənişsizdir. İştirak etmək istəyənlər əvvəlcədən partners.az saytına daxil olaraq və ya sərgi günü məkanda qeydiyyatdan keçə bilərlər.

İyunun 18-dək davam edəcək sərgi hər gün 10.00-dan 18.00-dək ziyarətçilər üçün açıq olacaq.