Prezident İlham Əliyev tərəfindən bu il ölkəmizdə “Heydər Əliyev İli” elan olunub. Müasir müstəqil dövlətimizin banisi, Ümummilli Lider Heydər Əliyevin 100 illik yubileyi ədliyyə orqanlarında geniş qeyd edilir.

AZƏRTAC xəbər verir ki, bu münasibətlə mayın 4-də Ədliyyə Nazirliyinin təşkilatçılığı ilə “Fairmont Baku” hotelində “Heydər Əliyev və məhkəmə-hüquq islahatları: tarix, zaman və nailiyyətlər” mövzusunda geniş konfrans keçirilir.

Tədbirdə ədliyyə naziri Fikrət Məmmədov, Ali Məhkəmənin sədri İnam Kərimov, İnsan hüquqları üzrə Müvəkkil (Ombudsman) Səbinə Əliyeva, Vəkillər Kollegiyasının sədri Anar Bağırov, Mediasiya Şurasının sədri Nadir Adilov, Naxçıvan Muxtar Respublikası ədliyyə və məhkəmə orqanlarının rəhbər şəxsləri, Məhkəmə-Hüquq Şurasının üzvləri, apellyasiya və birinci instansiya məhkəmələrinin sədrləri, hakimliyə namizədlər, ali təhsil müəssisələrinin və vətəndaş cəmiyyəti institutlarının təmsilçiləri, gənc ədliyyə işçiləri və könüllüləri, hüquqşünas tələbələr və media mənsubları iştirak edirlər.

Ümumilikdə 150-dək nümayəndənin qatıldığı tədbirdə əvvəlcə Ümummilli Lider Heydər Əliyevin mənalı ömür yoluna və titanik fəaliyyətinə həsr olunan film nümayiş etdirilib.

Konfransı giriş nitqi ilə açan ədliyyə naziri Fikrət Məmmədov məhkəmə-hüquq islahatlarında Heydər Əliyevin siyasi iradəsinin təntənəsi barədə geniş məruzə ilə çıxış edib.

Tədbir digər çıxışlar və müzakirələrlə davam edəcək.