İyunun 8-də “Baku Crystal Hall”da İqtisadiyyat Nazirliyinin dəstəyi, Kiçik və Orta Biznesin İnkişafı Agentliyi (KOBİA) və “Marsol Group”un birgə təşkilatçılığı, “Kapital Bank”ın rəsmi tərəfdaşlığı ilə “Heydər Əliyev və Azərbaycan sahibkarlığı” mövzusunda yerli şirkətlərin sərgisi öz işinə başlayıb.

AZƏRTAC xəbər verir ki, sərginin açılışına həsr olunmuş tədbirdə aidiyyəti dövlət qurumlarının rəhbər şəxsləri, sahibkarların ictimai birliklərinin nümayəndələri, eləcə də müxtəlif sahələrdə fəaliyyət göstərən iş adamları iştirak ediblər.

Tədbir Azərbaycanın Dövlət Himninin səslənməsi, Ulu Öndər Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin xatirəsinin bir dəqiqəlik sükutla yad olunması ilə başlayıb.

İqtisadiyyat nazirinin müavini Sahib Məmmədov çıxışında müstəqil Azərbaycan dövlətinin qurucusu, görkəmli dövlət xadimi Heydər Əliyevin digər sahələrdə olduğu kimi, ölkəmizdə bazar münasibətləri prinsipləri əsasında iqtisadiyyatın, o cümlədən özəl sektorun formalaşması və inkişafında müstəsna rol oynadığını, hazırda Ulu Öndərin Azərbaycanın sosial-iqtisadi inkişafı siyasətinin Prezident İlham Əliyev tərəfindən uğurla davam etdirildiyini vurğulayıb.

Bildirilib ki, ölkəmizdə biznes və investisiya mühiti davamlı olaraq yaxşılaşır, sahibkarlıq fəaliyyətini tənzimləyən qanunvericilik bazası və dəstək alətləri müasir çağırışlar əsasında təkmilləşdirilir. Qarşıdakı dövrdə də sahibkarlığın inkişafı, biznesin stimullaşdırılması məqsədilə tədbirlər davam etdiriləcək.

Azərbaycan Qida Təhlükəsizliyi Agentliyinin sədri Qoşqar Təhməzli agentliyin öz fəaliyyətini sahibkarlarla tərəfdaşlıq, şəffaflıq və hesabatlılıq, qərəzsizlik və bitərəflik, istehlakçı mənafeyinin üstünlüyü, innovativlik, səmərəlilik və nəticəyönümlülük, risk əsaslı yanaşma və beynəlxalq tələblərə uyğunluq prinsipləri üzərində qurduğunu diqqətə çatdırıb.

Agentliyin fəaliyyəti dövründə sahibkarların qida təhlükəsizliyi sistemi barədə məlumatlandırılması, maarifləndirilməsi, eyni zamanda, iş adamları ilə dövlət-özəl sektor əməkdaşlığının təmin edilməsi məqsədilə bir sıra biznes assosiasiyaları qurulub, ticarət palataları ilə birlikdə 190 tədbir təşkil olunub, 21 min 900-dən çox sahibkarla görüşlər keçirilib, həmçinin 35 min 84 müəssisə qida təhlükəsizliyi qeydiyyatına alınaraq, dövlət reyestrinə daxil edilib.

KOBİA-nın İdarə Heyətinin sədri Orxan Məmmədov ölkəmizdə kiçik və orta biznesin inkişafının və KOB-ların iqtisadiyyatda rolunun artırılmasının prioritet istiqamətlərdən olduğunu vurğulayıb, bu sahədə görülən tədbirlər, agentliyin KOB-lara göstərdiyi dəstək və xidmətlər barədə məlumat verib.

“Marsol Group”un və "İş adamları Cəmiyyətinin Milli Assosiasiyası" İctimai Birliyinin İdarə Heyətinin sədri Tural Mustafayev və "Kapital Bank" ASC-nin İdarə Heyətinin üzvü Fərid Hidayətzadə isə çıxışlarında ölkəmizdə sahibkarlara göstərilən dəstək, təmsil etdikləri təşkilatların fəaliyyəti barədə məlumat veriblər.

Sonra Ümummilli Lider Heydər Əliyevin həyat və fəaliyyətinə həsr olunmuş “Əbədiyyətin ilk əsri. Heydər Əliyev 100” filmi nümayiş olunub, tədbir iştirakçıları sərgi ilə tanış olublar.

Qeyd edək ki, sərginin təşkilinə Azərbaycan Sahibkarlar (İşəgötürənlər) Təşkilatları Milli Konfederasiyası, Dövlət Məşğulluq Agentliyi, "İş adamları Cəmiyyətinin Milli Assosiasiyası, “Prestij kimya”, “Gədəbəy mineral suları”, “Moon Qrup” və “BHB strateji və kreativ media agentliyi” tərəfindən də dəstək göstərilib.

Ümummilli Lider Heydər Əliyevin 100 illik yubileyinə həsr olunan sərginin məqsədi Ulu Öndərin ölkəmizdə sahibkarlıq ənənələrinin bərpasında və inkişafındakı xidmətlərini bir daha xatırlatmaq, eləcə də Azərbaycan şirkətlərinin daha geniş tanıdılması, bazarlara çıxış imkanlarının genişləndirilməsi, iş adamları arasında biznes tərəfdaşlığının inkişaf etdirilməsi və yeni əməkdaşlıqların qurulmasıdır.

Sərgidə sənaye, kənd təsərrüfatı, qida, İKT, təhsil, inşaat, logistika, tekstil və digər sahələrdə fəaliyyət göstərən 150-dən çox yerli şirkətin məhsul və xidmətləri nümayiş olunur. İyunun 10-dək davam edəcək sərginin başlıca üstünlüyü burada iqtisadiyyatın bütün sektorları üzrə məhsul və xidmətlərin təqdim olunmasıdır. Sərgi çərçivəsində iş adamları arasında ikitərəfli görüşlər də keçiriləcək.

KOBİA sərgidə ayrıca stendlə təmsil olunur. Agentliyin dəstəyi ilə stenddə qida, kənd təsərrüfatı, nəşriyyat, sənaye, İKT və xidmət sahələrində fəaliyyət göstərən 13 KOB subyekti, o cümlədən Azərbaycan Qadın Sahibkarlığının İnkişafı Assosiasiyasından 2 qadın sahibkar məhsul və xidmətlərini təqdim edir.

Sərgi çərçivəsində iyunun 9-da “Baku Crystal Hall”da “Böyük qayıdış - işğaldan azad olunmuş ərazilərdə investisiya imkanları və güzəştlər”, iyunun 10-da isə “Müasir çağırışlar fonunda iqtisadi transformasiya: rəqabətli və dayanıqlı bizneslərin formalaşması” mövzularında panel müzakirələr təşkil olunacaq.