Mayın 1-də Gənclər Fondunun dəstəyi, “Davam” Gənclər Hərəkatının təşkilatçılığı ilə Ulu Öndər Heydər Əliyevin 100 illik yubileyinə həsr olunmuş “Davamçı Gənclərin İkinci Forumu” keçirilib.

AZƏRTAC xəbər verir ki, əvvəlcə Azərbaycan xalqının Ümummilli Lideri Heydər Əliyevin və ölkəmizin müstəqilliyi, ərazi bütövlüyü uğrunda həlak olan şəhidlərimizin xatirəsi bir dəqiqəlik sükutla yad edilib.

Sonra Azərbaycan Respublikasının Dövlət Himni səsləndirilib.

Forumda açılış nitqi ilə çıxış edən “Davam” Gənclər Hərəkatının sədri Nihad Allahyarlı deyib ki, bu il Prezident İlham Əliyevin müvafiq Sərəncamı ilə ölkəmizdə ”Heydər Əliyev İli” elan edilib. “Ulu Öndərin müstəqil Azərbaycanımıza rəhbərlik etdiyi dövrdə uşaq, indi isə gənc olan bir nəslin nümayəndəsiyik. Nə xoş bizə ki, Ümummilli Liderin layiqli davamçısı Prezident İlham Əliyevin rəhbərliyi altında ərazi bütövlüyümüz bərpa olundu. Türk dövlətləri birliyi xəyalı bu gün artıq reallığa çevrilib. Hazırda Avropanın enerji təhlükəsizliyində mühüm rol oynayan ölkəmiz 60 milyarda yaxın strateji valyuta ehtiyatına malikdir. Özü kredit verən, humanitar yardım göstərən regionun lider dövlətidir.

Ötən il ərzində “Davam” Gənclər Hərəkatı tərəfindən gənclər siyasətinin müxtəlif sahələrini əhatə edən 1026 tədbir keçirilib. 492 təlim, 267 görüş, 84 aksiya, 27 onlayn-tədbir, 34 müsabiqə, 2 fləş-mob, 4 düşərgə, 18 infotur, 12 təqdimat, o cümlədən əlamətdar günlərə həsr olunmuş 52 tədbir həyata keçirib. Ümumilikdə fəaliyyətimizlə orta hesabla birbaşa olaraq 40 minə yaxın, dolayı yolla isə 150 minə yaxın gənc yararlanıb”, - deyə N.Allahyarlı bildirib.

Gənclər Fondunun icraçı direktorunun müavini Qədir Xəlilov ölkəmizdə uğurlu dövlət gənclər siyasətinin əsasının xalqımızın Ümummilli Lideri Heydər Əliyev tərəfindən qoyulduğunu deyib. Bildirib ki, Ulu Öndər hər zaman gənclərə xüsusi qayğı ilə yanaşıb, gənclərin problemi hər an onun diqqət mərkəzində olub, yüksək intellektual səviyyəyə, müasir dünya görüşə malik gəncin yetişməsinə olduqca böyük əhəmiyyət verib. Ulu Öndər Heydər Əliyevin Azərbaycan gəncliyinə böyük qayğısı təkcə müstəqillik illərində deyil, hələ sovet dönəmində də olub.

“Heydər Əliyev həmişə gənclərimizə böyük ümidlər bəsləyir və qeyd edirdi ki, Azərbaycanın gələcəyi gənclərin əlindədir. Dövlətin gənclər siyasəti bu gün Ümummilli Liderin layiqli davamçısı Prezident İlham Əliyev tərəfindən yeni inkişaf mərhələsinə qaldırılıb. Gənclərin hərtərəfli inkişafı, mükəmməl təhsil alması, müxtəlif sahələr üzrə potensialının aşkar edilməsi, bacarıqlarının stimullaşdırılması üçün münbit şərait yaradılıb”, - deyə Qədir Xəlilov qeyd edib.

Tarix elmləri doktoru, professor Dilarə Seyidzadə və Dini Qurumlarla İş üzrə Dövlət Komitəsi sədrinin birinci müavini Səyyad Salahlı Ulu Öndər Heydər Əliyevlə bağlı öz xatirələrini bölüşüblər. Qeyd olunub ki, dahi şəxsiyyət Heydər Əliyevin həyatı böyük bir məktəb, sərvət və xəzinədir. Ulu Öndər gənclərlə tez-tez görüşlər keçirirdi, onların problemləri ilə yaxından maraqlanırdı. Onun bütün arzuları gənclərlə bağlı idi. Heydər Əliyevin əziz xatirəsi daim bizim qəlbimizdədir.

Qeyd olunub ki, fenomenal yaddaşa malik olan Ulu Öndər nəinki Azərbaycan, həmçinin dünya tarixini də mükəmməl bilirdi. O, əmək fəaliyyətində dərin tarixi biliklərinə arxalanırdı. Ona görə də hər bir gənc Azərbaycan tarixini dərindən bilməlidir, çünki tarixi bilən insan hər zaman qələbəyə nail olacaq.

Forumun sonunda təltifolunma mərasimi keçirilib.