İqtisadiyyat Nazirliyinin tabeliyindəki Dördüncü Sənaye İnqilabının Təhlili və Koordinasiya Mərkəzi, İnnovasiya və Rəqəmsal İnkişaf Agentliyinin dəstəyi və FARI Solutions tərəfindən Bakıda keçirilən “Chain Reaction 2024” tədbiri dünyanın ən böyük kriptovalyuta birjası Binance və aparıcı blokçeyn ekosisteminin dəstəyi ilə keçirilir.

AZƏRTAC xəbər verir ki, blokçeyn və paylanmış reyester texnologiyası (DLT), kvant informasiya sistemi, Veb3, 4-cü sənaye inqilabı texnologiyaları, süni intellekt və rəqəmsal aktivlər kimi inkişaf etməkdə olan texnologiyalara yönəlmiş ikigünlük tədbirə 60-dan çox yerli və beynəlxalq spiker qatılıb.

Konfransda Binance-in Qlobal Baş Marketinq Direktoru Reyçel Konlan və Qlobal Regional Bazarlar üzrə rəhbəri Vişal Saçindran, həmçinin Azərbaycanın İnnovasiya və Rəqəmsal İnkişaf Agentliyinin sədri İnara Vəliyeva, 4-cü Sənaye İnqilabı Mərkəzinin (C4IR) icraçı direktoru Fariz Cəfərov, Lixtenşteyn Maliyyə Bazarının İnnovasiya və Rəqəmsallaşma İdarəsinin müdir müavini Dr. Anjelika Layr kimi tanınmış simalar çıxış edəcəklər. Tədbirdə, həmçinin Barings, Vodafone, Syz Group, Beincrypto, Jadwa Investment, Dow Jones, EY, Deloitte kimi dünya miqyaslı şirkətlərin nümayəndələri də iştirak edirlər.

Təşkilatçılar bildirib ki, texnologiya həvəskarları, kripto yenilikçilər və sənayeyə yeni qoşulanlar bu əhəmiyyətli tədbirdə iştirak edir. Rəqəmsal iqtisadiyyatın gələcəyini formalaşdıran yenilikləri öyrənmək, vizionerlərlə ünsiyyət qurmaq və kriptovalyutalar, Web3 inkişafı və tokenləşdirilmiş aktivlər kimi anlayışlarla tanış olmaq üçün nadir bir fürsətdir. Tədbirdə həmçinin Bitcoin-in iş sübutu (proof-of-work) kimi konsensus protokollarının davamlılığı və inkişaf perspektivləri ilə bağlı mühüm müzakirələr aparılacaq.

İki gün ərzində panellər, vörkşoplar və təqdimatlar da daxil olmaqla 30-dan çox müxtəlif sessiyalar təşkil olunacaq.