İcbari Tibbi Sığorta üzrə Dövlət Agentliyinin, TƏBİB-in, Respublika Kliniki Uroloji Xəstəxanasının, Azərbaycan Nefroloqlar Cəmiyyəti və “Nefrologiyanın İnkişafına Yardım” İctimai Birliyinin təşkilatçılığı ilə “Böyrəklərimiz haqqında daha çox məlumatlanaq” adlı XVIII elmi-praktik konfrans keçirilib.

AZƏRTAC xəbər verir ki, konfransda ölkədə fəaliyyət göstərən həkim-uroloq, həkim-nefroloq və hemodializ üzrə aparıcı mütəxəssislər iştirak ediblər.

Tədbirdə Respublika Kliniki Uroloji Xəstəxanasının rəhbəri Fariz Babayev son bir ildə xəstəxanadakı yeniliklər barədə məlumat verib. Bildirib ki, 14 Mart - Ümumdünya Böyrək Günüdür. Bu təqvim günü bütün dünyada 2006-cı ildən etibarən hər il martın ikinci cümə axşamı günü rəsmi şəkildə qeyd edilir. Bu günün qeyd olunmasında əsas məqsəd insanları böyrək xəstəlikləri haqqında problemlərlə tanış etmək, böyrək problemi olan insanların vaxtında həkimlərə müraciət etməsi üçün məlumatlandırmaqdır. Hər il ölkəmizdə bu təqvim günü qeyd olunur və bu təqdirəlayiq bir haldır. Bu tipli tədbirlərin keçirilməsi Azərbaycanın səhiyyə sahəsində, həmçinin yaxşı kadrların hazırlanmasında mühüm əhəmiyyət kəsb edir.

Sonra çıxış edən TƏBİB-in Tibbi innovasiyalar şöbəsinin müdiri Teymur Mirzəbəyli “Xroniki böyrək çatışmazlığı üzrə Tədbirlər proqramı” və hazırda müalicə alan böyrək xəstələri barədə ümumi məlumat verib. Bildirib ki, böyrək xəstəliyi Azərbaycanda geniş yayılıb. Ölkəmizdə 2023-cü ildən bu günə qədər 21 xəstəyə böyrək köçürülməsi prosesi həyata keçirilib. böyrək xəstəlikləri cəmiyyətimizdə əsas sosial problemlərdəndir. Bu səbəbdən də “Xroniki böyrək çatışmazlığı üzrə Tədbirlər Proqramı” çərçivəsində 43 adda dərman vasitəsi, 35 adda tibbi sərfiyyat materialları və ləvazimat xəstələrə təqdim edilib. Bu günə qədər ölkəmizdə 37 orqan transplantasiyası həyata keçirilib. Onlardan 21-i böyrək transplantasiyası olub. Hazırda 4 mindən çox aktiv dializ proseduru alan xəstə var. Bütün bunlar icbari tibbi sığorta xidmətləri zərfi çərçivəsində aparılan orqan transplantasiyası əməliyyatlarıdır.

TƏBİB-in Davamlı tibbi təhsil şöbəsinin müdiri Emil İskəndərli bu günün qeyd olunmasının önəmli olduğunu bildirib və bu sahədə çalışan həkimlərə uğurlar arzu edib. Bildirib ki, hər il bütün dünyada Ümumdünya Böyrək Günü qeyd olunur. Təqdirəlayiq haldır ki, hər il bu təqvim günü Azərbaycanda da keçirilir. Zaman keçdikcə ölkələr bu prosesə qoşulur. Hazırda dünyada 88 ölkə bu günü qeyd edir. Həmin prosesə qoşulan ölkələr tədricən artmaqda davam edir.

Konfrans zamanı “Hemodializ üzrə klinik protokol”, "Böyrək Transplantasiyası - 2024: dünəni, bu günü, gələcəyi”, “Böyrək törəmələrində orqan qoruyucu cərrahiyyə”, “Orqan transplantasiyasının tibbi və etik aspektləri”, “Uşaqlarda sidik yolu infeksiyası. Protokollar nə deyir?”, “Xroniki böyrək xəstəliyi ilə fəsadlaşan nefrolitiazlı xəstələrdə qanda lipid komponentlərinin və β2 - mikroqlobulinin rolu”, “Hemodializin tarixi haqqında” mövzular müzakirə edilib.

Qeyd edək ki, 2006-cı ildən hər il martın ikinci cümə axşamı Ümumdünya Böyrək Günü qeyd edilir.