Noyabrın 4-də Dini Qurumlarla İş üzrə Dövlət Komitəsinin (Dövlət Komitəsi) tabeliyində Mənəvi Dəyərlərin Təbliği Fondunun (MDTF) təşkilatçılığı ilə “Biz birlikdə güclüyük” mövzusunda konfrans keçirilib.

AZƏRTAC xəbər verir ki, tədbirin əvvəlində xalqımızın milli-mənəvi dəyərlərinin, birlik və həmrəyliyinin, Azərbaycanın tolerant və multikultural modelinin təbliği, o cümlədən birgəyaşayış formulunun daha geniş kütləyə çatdırılması məqsədilə MDTF-nin sifarişi ilə hazırlanan “Müasir çağırışlar: birgəyaşayış nümunəsi” adlı qısametrajlı sənədli film nümayiş olunub.

Dini Qurumlarla İş üzrə Dövlət Komitəsinin sədri Mübariz Qurbanlı açılış nitqi ilə çıxış edərək deyib: “Biz birlikdə güclüyük. Birlikdə olduğumuza görə qarşımızda duran bütün məsələləri həll edə bilirik. Bu gün tolerantlığın Azərbaycan nümunəsi dünyada ən mükəmməl modellərdən biri kimi qəbul olunur”.

O bildirib ki, bu gün dünyada həm tolerantlıq, həm də multikultural dəyərlərə sadiq olmaq olduqca vacibdir. “Hamımız görürük ki, hazırkı dövrdə dünyamız təhlükədədir. İnsanların həyatını itirməsi, baş verən münaqişələr bunu deməyə əsas verir. Təəssüf ki, belə hallar davam etməkdədir. Əlbəttə, bu münaqişələr təkcə dini deyil, müxtəlif aspektlərdə baş verir. Azərbaycan isə özünün tarixi keçmişi və ənənələri ilə dünyaya nümunə olacaq ölkələr sırasındadır. Biz böyük tarixi bir yol keçmişik. Ərazimizdə müxtəlif dinlərin nümayəndələri yaşamaqdadır. Ölkəmizin coğrafi mövqeyi, əhalisinin etnik tərkibi qədim dövrdən burada fərqli dinlərin mövcudluğuna şərait yaradıb. Bütpərəstlik, zərdüştlük, yəhudilik, xristianlıq, İslam və digər dini inanclar Azərbaycan ərazisində yayılıb”, - deyə komitə sədri vurğulayıb.

M.Qurbanlı əlavə edib ki, bu gün dünya miqyasında demokratik dəyər kimi təbliğ olunan tolerantlıq Azərbaycan xalqının minilliklər boyu formalaşmış xarakterik xüsusiyyətidir. Tolerantlığın Azərbaycan xalqının xarakterik xüsusiyyəti olduğunu sübut etmək üçün geniş tədqiqat aparılmasına ehtiyac yoxdur. Çünki əsrlər boyu Azərbaycanda kilsələr və sinaqoqlar məscidlərlə yanaşı fəaliyyət göstərib, nəticədə Vətənimiz tolerantlıq mərkəzlərindən birinə çevrilib.

Bakı Beynəlxalq Multikulturalizm Mərkəzinin icraçı direktoru Rəvan Həsənov çıxışı zamanı tolerantlığın

Azərbaycanda həyat tərzi olduğunu vurğulayıb. Bildirib ki, Azərbaycan müstəqillik qazandıqdan sonra bu məsələyə xüsusi diqqət ayrılıb. “Tolerantlıq Gününün Zəfər Günü ilə eyni vaxta düşməsi təsadüfi haldır. Əslində, bunun özündə də böyük bir mahiyyət var ki, İkinci Qarabağ müharibəsindəki Zəfərimizin arxasında duran ideya birlik, qardaşlıq idi. Çünki bu torpaqlarımızın azadlığı, ölkəmizin ərazi bütövlüyü və suverenliyi uğrunda mübarizədə dinindən, dilindən, mədəniyyətindən asılı olmayaraq, hər kəs öz canını və sağlamlığını qurban verib”, - deyə İcraçı direktor bildirib.

Digər çıxış edənlər - Qafqaz Müsəlmanları İdarəsi sədrinin müavini Fuad Nurullayev, Azərbaycan İlahiyyat İnstitutunun rektoru Aqil Şirinov, Rus Pravoslav Kilsəsinin Bakı və Azərbaycan Yeparxiyası Şurasının katibi Elnur Əfəndiyev, Azərbaycan Katolik kilsəsinin nümayəndəsi Yozef Marek, Azərbaycan Bəhailəri Mərkəzinin katibi Ramazan Əsgərli, “Azərbaycan Bibliya Cəmiyyəti” xristian dini icmasının sədri Rasim Xəlilov mövzu ilə bağlı fikirlərini bölüşüblər.

Fərqli dinlərin daşıyıcılarına münasibətdə tolerantlıq və birgəyaşayış ənənələrinin əhəmiyyətinə diqqət çəkilən konfrans müzakirələrlə yekunlaşıb.