Noyabrın 14-də Dini Qurumlarla İş üzrə Dövlət Komitəsinin (DQİDK) tabeliyində olan Mənəvi Dəyərlərin Təbliği Fondunun təşkilatçılığı ilə Beynəlxalq Tolerantlıq Günü münasibətilə “Azərbaycan: birgəyaşayış nümunəsi” mövzusunda konfrans keçirilir.

AZƏRTAC xəbər verir ki, konfransda Dini Qurumlarla İş üzrə Dövlət Komitəsinin, Mənəvi Dəyərlərin Təbliği Fondunun və Bakı Beynəlxalq Multikulturalizm Mərkəzinin rəhbər şəxsləri, Milli Məclisin deputatları, ölkəmizdə fəaliyyət göstərən müsəlman və qeyri-müsəlman dini icmalarının rəhbərləri, üzvləri, ziyalılar, gənclər və ictimaiyyət nümayəndələri iştirak edirlər.

Tədbirdə Azərbaycanda formalaşmış dini tolerantlıq mühitinin qorunub saxlanılması və onun daha da möhkəmləndirilməsi, eyni zamanda, bu sahədə əldə edilən nailiyyətlərin beynəlxalq ictimaiyyətə təbliği barədə fikir mübadiləsi aparılacaq.

Konfransın gedişində, həmçinin “Tolerantlıq nümunəsi”, “Biz birlikdə güclüyük” və “Vəhdət dəyərimizdir” adlı qısametrajlı filmlər nümayiş etdiriləcək.