Sentyabrın 26-da Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Ailə - dəyişməyən dəyərimiz” mövzusunda Gənc Ailə Forumu keçirilir.

AZƏRTAC xəbər verir ki, iki hissədən ibarət olacaq Forumda rəsmi qonaqlar, aidiyyəti sahə üzrə 20 mütəxəssis, media nümayəndələri, bölgələrdən və paytaxtdan dəvət olunan 90-dan çox gənc ailə iştirak edir.

Tədbirin ailə münasibətləri mövzularında təşkil olunacaq 6 müzakirə panelində aktual məsələlərlə bağlı fikir mübadilələri aparılacaq, suallar, rəylər və təkliflər qeydə alınacaq.

Forumun rəsmi hissəsində panel müzakirələri zamanı gənc ailələr tərəfindən hökumət nümayəndələrinə suallar ünvanlanacaq, sonra ailələrə forumda iştiraka görə sertifikatlar təqdim ediləcək.

Sonda forum bədii hissə ilə yekunlaşacaq.

Qeyd edək ki, Forumun keçirilməsində əsas məqsəd yeniləşən Azərbaycanda ailə institutunun möhkəmləndirilməsi, ənənəvi dəyərlərin qorunması və inkişafı, eyni zamanda, müasir cəmiyyətdə ailənin gənc nəslin hərtərəfli formalaşmasında yeri və rolu barədə yeni yanaşmaların müzakirəsidir.