Bakı Expo Mərkəzində Kiçik və Orta Biznesin İnkişafı Agentliyi (KOBİA) və “Marsol Group”un təşkilatçılığı ilə “7-ci Yerli Şirkətlərin Tanıtım Sərgisi”nin açılışı mərasimi keçirilib.

AZƏRTAC xəbər verir ki, 4 gün davam edəcək sərgidə qida, informasiya kommunikasiya texnologiyaları, təhsil, inşaat, sənaye, kənd təsərrüfatı, logistika, tekstil və digər sahələrdə fəaliyyət göstərən 300-dən çox yerli şirkət öz məhsul və xidmətlərini nümayiş etdirir.

Sərginin keçirilməsində məqsəd Azərbaycan şirkətlərinin fəaliyyətini geniş kütləyə tanıtmaq, onlar üçün yeni bazarlar açmaq və şirkətlər arasında qarşılıqlı, faydalı əməkdaşlığı inkişaf etdirməkdən ibarətdir.

İş Adamları Cəmiyyətinin Milli Assosiasiyası (İCMA), Dövlət Məşğulluq Agentliyi və Azərbaycan Dövlət Reklam Agentliyi sərginin tərəfdaşları sırasındadır.

Açılış mərasimində çıxış edən iqtisadiyyat nazirinin müavini Rövnəq Abdullayev, KOBİA İdarə Heyətinin sədri Orxan Məmmədov, kənd təsərrüfatı nazirinin müavini Seymur Səfərli, ekologiya və təbii sərvətlər nazirinin müavini Vüqar Kərimov, əmək və əhalinin sosial müdafiəsi nazirinin müavini Rəşad Mustafayev və başqaları sərginin əhəmiyyətindən, ölkəmizdəki sosial iqtisadi islahatlardan danışıblar.

Nəzərə çatdırılıb ki, bu sərgi yerli şirkətlərin bir çox sahədə yararlana biləcəyi mühit yaratmaq üçün səmərəli platformadır, dövlət-özəl sektor münasibətlərində etimadın və davamlılığın gücləndirilməsinə xidmət edir. Şirkətlər sərgidə iştirak etməklə öz məhsul və xidmətlərini daha böyük auditoriyaya təqdim etmək, potensial müştərilərlə təmas yaratmaq, yeni müştərilər qazanmaq, əməkdaşlıq edə biləcəkləri şirkətlərlə əlaqə yaratmaq imkanı əldə edirlər. Burada satış proseslərini daha səmərəli etmək, dövlətin biznesə dəstək mexanizmləri barədə maariflənmək də olar.

Sərgidə Azərbaycan iqtisadiyyatının ayrı-ayrı istehsal və xidmət sektorunda fəaliyyət göstərən sahibkarlar arasında geniş əlaqələr qurulacaq və inkişafa doğru daha da ciddi addımlar atılacaq.