Artıq ikinci dəfədir Azərbaycanda Bakı İqlim Fəaliyyəti Həftəsi çərçivəsində rəsm sərgisi və startap layihələrinin qiymətləndirilməsi günü təşkil olunur. Burada incəsənət və innovasiyalar birgə vəhdət təşkil edir.

AZƏRTAC xəbər verir ki, bunu COP29 Prezidenti Muxtar Babayev Bakı İqlim Fəaliyyəti Həftəsi çərçivəsində

Heydər Əliyev Mərkəzində keçirilən “Dayanıqlı Expo: Planet üçün incəsənət və innovasiya” tədbirinin açılışında deyib.

O bildirib ki, sərgi həm yerli, həm də beynəlxalq ekspertlər tərəfindən dəyərləndiriləcək: “Əminəm ki, burada təqdim olunan əsərlər və yeni layihələr hər kəsdə böyük maraq və zövq oyadacaq. Heydər Əliyev Mərkəzinin rəhbərliyinə minnətdarlığımızı bildiririk. Mərkəz hər zaman böyük layihələrə dəstək göstərir və bu, bizim üçün çox dəyərlidir”.

Muxtar Babayev, həmçinin COP29 komandasının fəaliyyəti barədə danışıb: “COP29-un iqlim üzrə yüksəksəviyyəli çempionu Nigar Arpadarai və onun komandası Bakı İqlim Fəaliyyəti Həftəsini təşkil edib. Bu, artıq ikinci ildir keçirilir və əminik ki, növbəti illərdə də davam edəcək. Dünyada iqlim həftələri çox populyardır. Bir neçə gün əvvəl Nyu-Yorkda keçirilən İqlim Həftəsində də fəal iştirak etdik. İndi Bakı mərhələsidir, daha sonra digər ölkələrdə davam edəcək. İlin sonunda isə Braziliyada Sədrliyimizi digər ölkəyə təqdim edəcəyik”.

O əlavə edib ki, bütün bu uğurlar Azərbaycanın dövlət rəhbərliyinin diqqəti və dəstəyi sayəsində mümkün olub: “Prezident İlham Əliyevin bu məsələlərə göstərdiyi xüsusi diqqət və liderliyi nəticəsində bu gün böyük uğurlar əldə edirik. Onun iradəsi və layihələrin icrası Azərbaycanın tərəfdaşlarına və beynəlxalq ictimaiyyətə də nümunə kimi çatdırılır”.