Trans-Xəzər Beynəlxalq Nəqliyyat Marşrutu (Orta Dəhliz) boyu bütün nəqliyyat infrastrukturunun potensialı biri-birinə uyğunlaşdırılmalıdır.

AZƏRTAC xəbər verir ki, bu fikirləri "Bakı Beynəlxalq Dəniz Ticarət Limanı" QSC-nin departament müdiri Xudayar Həsənli Bakı Enerji Həftəsi çərçivəsində təşkil olunan “Orta Dəhliz: perspektivlər və çağırışlar” panelində deyib.

X.Həsənli qeyd edib ki, Bakı Limanının gücü artırıldığı zaman digər infrastrukturların potensialı aşağı olsa, bu, heç də səmərəli olmayacaq: "Baş verən geosiyasi vəziyyətlə də əlaqədar Orta Dəhliz boyu yüklərin həcmində artım oldu. Bu zaman ortaya bir sıra problemlər çıxdı. Yüklərin vaxtında daşınması və koordinasiya ilə bağlı problemlərlə üzləşdik. Lakin bu istiqamətdə ciddi işlər həyata keçirildi. Sadaladığım problemlər aradan qaldırıldı və bunun nəticəsi olaraq ilin əvvəlindən Çindən blok qatarların qəbulu və yola salınması uğurla həyata keçirildi", - deyə X.Həsənli əlavə edib.

"Trans-Xəzər Beynəlxalq Nəqliyyat Marşrutu" Beynəlxalq Assosiasiyasının Baş katibi Qaydar Abdikerimov qeyd edib ki, Trans-Xəzər Beynəlxalq Nəqliyyat Marşrutu Çin, Azərbaycan, Qazaxıstan, Xəzər dənizi, Gürcüstan ərazisindən keçərək Türkiyə və Avropa ölkələrinə qədər uzanan beynəlxalq nəqliyyat dəhlizidir. 2023-cü ildə bu marşrutla 2,7 milyon tondan çox yük daşınıb ki, bu da 2022-ci illə müqayisədə 86 faiz çoxdur. 2024-cü il üçün perspektiv plan təxminən 4 milyon tondur.

Rəqəmsal İnkişaf və Nəqliyyat Nazirliyinin (RİNN) Nəqliyyat siyasəti şöbəsinin müdiri Fariz Əliyev bildirib ki, Orta Dəhliz uzaq Çini Şərqi Avropaya birləşdirən ən qısa, etibarlı, səmərəli nəqliyyat layihəsidir. Orta Dəhlizin potensialının reallaşdırılması üçün çox ciddi layihələr həyata keçirilib.

O bildirib ki, Orta Dəhliz dünya ictimaiyyətinin diqqətindədir, orta və uzunmüddətli dövrdə bu dəhlizlə daşımaların 11 milyon tona, sonra isə 30 milyon tona çatacağı planlaşdırılır.

“Azərbaycan Dəmir Yolları” QSC-nin (ADY) Kommersiya departamentinin müdiri Məmməd Həmidov qeyd edib ki, bu ilin yanvar-may aylarında Azərbaycanda dəmir yolu ilə tranzit daşımaların həcmi ötən ilin eyni dövrü ilə müqayisədə 11 faiz çox olub.

“O cümlədən dəmir yolu ilə daxili yükdaşımalarda 6 faiz artım olub. Bu, görülən mühüm işlərin nəticəsidir. Həmin işlərə misal olaraq genişləndirilməsi bu yaxınlarda tamamlanmış Bakı-Tbilisi-Qars (BTQ) dəmir yolu xəttini göstərmək olar. Mayın 20-də bu yolla yüklərin daşınmasına start verilib və ilk yük qatarı yola salınıb”, – deyə M.Həmidov qeyd edib.