Ötən 6 ay ərzində qanunvericiliyin təkmilləşdirilməsi istiqamətində komitə tərəfindən 6 sənəd layihəsi hazırlanıb. “Uşaqlara dair strategiyanın həyata keçirilməsi üzrə fəaliyyət Planı”na uyğun olaraq “Uşaq hüquqları haqqında” yeni qanun layihəsi üzərində işləyirik.

AZƏRTAC xəbər verir ki, bu sözləri Ailə, Qadın və Uşaq Problemləri üzrə Dövlət Komitəsinin sədri Bahar Muradova iyulun 19-da komitənin cari ilin ilk 6 aylıq fəaliyyətinə həsr olunmuş mətbuat konfransı zamanı səsləndirib.

Komitə sədri bildirib ki, “Gender bərabərliyinin təminatları haqqında” Qanunun 20-ci maddəsinə uyğun olaraq, cari ilin sentyabr ayında Milli Məclisin plenar iclasında gender bərabərliyinin təmin edilməsi ilə bağlı 2022-ci ilə dair məlumat təqdim ediləcək.

“Ötən müddətdə ailə məsələləri üzrə 6 layihə reallaşdırılıb, həmçinin 40 təlim keçirilib ki, burada 8 mindən çox insan iştirak edib”, - deyə o bildirib.