“Ölüm var ki, həyat qədər dəyərli”... Vaxtilə məşhur şairin qələmindən çıxan bu misralar necə də yerinə düşür. Doğrudan da “gəlimli-gedimli, bir ucu ölümlü” dünyada müqəddəs amallar uğrunda olan dəyərli ölümlər də var. Xalq, Vətən, millət yolunda, milyonların həyatı üçün canını qurban verənlərin qəhrəmanlığı belə ölümlərdəndir. Dörd il əvvəl peşə fəaliyyətini yerinə yetirərkən şəhidliyə qovuşan AZƏRTAC-ın əməkdaşı Məhərrəm İbrahimovun itkisi də müqəddəs amallar uğrunda idi. 2020-ci ildə Vətən müharibəsi nəticəsində qazanılan möhtəşəm Zəfərdən sonra altı aydan artıq müddətdə onun Qarabağ bölgəsini və ətraf rayonların işğaldan azad edilmiş ərazilərini kəndbəkənd, məhəllə-məhəllə, ev-ev, addım-addım dolaşaraq erməni qəddarlığını və onların vurduğu ziyanları tarix üçün sənədləşdirməsi əsl fədakarlıq nümunəsi, onu tanıyanlar üçün isə göynərtili itki, faciəli ölüm idi…

Hadisə 2021-ci il iyunun 4-də səhər baş verib. Kəlbəcərin Susuzluq kəndinə gedən yolda tank əleyhinə minanın partlayışı nəticəsində həlak olanlar arasında AZƏRTAC-ın işğaldan azad edilmiş bölgələrə ezam olunmuş müxbiri Məhərrəm İbrahimov da var idi...

Məhərrəm İbrahimovun şəhid olmasının dördüncü ildönümündə - iyunun 4-də AZƏRTAC-ın əməkdaşları unudulmaz həmkarlarının dəfn olunduğu Müşfiqabad qəsəbəsindəki qəbiristanlığa gedərək onun məzarını ziyarət ediblər. Anım mərasimində Binəqədi Rayon İcra Hakimiyyətinin, Binəqədi bələdiyyəsinin nümayəndələri və şəhid-jurnalistin ailə üzvləri iştirak ediblər.

Mərasimdə çıxış edən AZƏRTAC-ın İşlər İdarəsinin müdiri Rauf Süleymanov, bölmə müdiri Abdulla Suvar, aparıcı müxbir Elçin Hüseynov 2021-ci ilin iyununda baş verən faciəli hadisəni yada salaraq yenidən həmin günləri xatırlayıblar. Qeyd edilib ki, Məhərrəm daim qaynar nöqtələrdə, hadisələrin mərkəzində olmağa can atırdı. O, düşmən atəşi nəticəsində dağılmış evlərə, obyektlərə üz tutur, hadisə yerindən xəbərlər, reportajlar hazırlayıb redaksiyaya göndərirdi. Sorağı gah Ağdamdan, Füzulidən, gah da Cəbrayıldan, Zəngilan və Qubadlıdan gəlirdi. Təəssüf ki, Kəlbəcər həmin ünvanların sonuncusu oldu.

Onlar qeyd ediblər ki, hərbi jurnalist kimi üzərinə düşən işi lazımınca yerinə yetirən Məhərrəm İbrahimov Vətən müharibəsi başa çatandan sonra da vəzifəsini bitmiş saymadı. Uzun illər düşmən işğalı altında olan qədim yurd yerlərimizin azad nəfəs alması onu hədsiz dərəcədə sevindirirdi. Ezamiyyə müddətində bir-iki günlüyə Bakıya gəlib ailə üzvləri, iş yoldaşları ilə görüşəndə də daim Qarabağa tələsirdi. O, işğaldan azad edilmiş bölgələrdə erməni vandallarının viran qoyduğu yaşayış məntəqələrini jurnalist həmkarları ilə birlikdə lentə alır, dağıntıları, xarabaya çevrilmiş yurd yerlərinin mövcud vəziyyətini tarixə çevirirdi. Qarabağda və ətraf bölgələrdə törədilmiş dəhşətlərin sənədləşdirilməsi gələcək nəsillərin baş verənlərdən xəbər tutması, qan yaddaşımız üçün çox dəyərli və gərəkli bir iş idi. Özünün dediyinə görə, bu işi başa çatdırmaq üçün bir-iki ay, bəlkə də bir neçə gün qalırdı...

Ziyarət iştirakçıları ölümündən sonra 3-cü dərəcəli “Vətənə xidmətə görə” ordeninə layiq görülən şəhid-jurnalistin haqqında ürək sözlərini deyib, xatirələrini bölüşüblər. Belə bir fikir ifadə edilib ki, azad olunmuş torpaqlarda zaman keçdikcə həyat yenidən canlanacaq, quruculuq işləri amansız işğalın izlərini itirəcək, gələcək nəsillər işğal dövründə erməni qəddarlığının dağıdıcı izlərini onların çəkdiyi, arxivləşdirdiyi və yazdıqları materiallar əsasında öyrənəcəklər.

Ailə üzvləri adından çıxış edən mərhum jurnalistin qardaşı Əsgər İbrahimov və bacısı Sevda Əsgərova Məhərrəmin xatirəsini əziz tutduqlarına görə onlara minnətdarlıq edib, şəhid-jurnalistin ruhuna dualar oxunub, məzarına gül-çiçək dəstələri qoyulub.

Ziyarətdən sonra şəhid-jurnalistin şərəfinə ehsan süfrəsi açılıb.