Bakıda Azərbaycan-Sloveniya biznes-forumu keçirilib.

AZƏRTAC xəbər verir ki, biznes-forumda Azərbaycanın xarici işlər naziri Ceyhun Bayramov, maliyyə nazirinin müavini Anar Kərimov, Azərbaycan Respublikası İxracın və İnvestisiyaların Təşviqi Agentliyinin (AZPROMO) icraçı direktorunun müavini Tural Hacılı, Sloveniyanın Baş nazirinin müavini, xarici işlər və Avropa işləri naziri Tanya Fayon, Biznesin İnkişafı Agentliyinin katibi Tanya Drobinç, İqtisadiyyat, Turizm və İdman Nazirliyinin baş katibi Mitja Blaganje ilə yanaşı Sloveniyadan gələn, yerli iş adamları və biznes qurumlarının rəhbərləri iştirak ediblər.

Forumda çıxış edən xarici işlər naziri Ceyhun Bayramov qarşılıqlı əlaqələrin inkişafı perspektivlərindən danışıb. Qeyd olunub ki, hər iki dövlət beynəlxalq platformalarda yaxın əməkdaşlıq əlaqələrinə malikdir və bu əlaqələrin inkişafı tərəflər üçün faydalıdır: “Dövlətlərimiz arasında enerji, kənd təsərrüfatı, ticarət, turizm, səhiyyə sahələrində əməkdaşlıq əlaqələri mövcuddur. Bu gün keçirilən biznes-forum hər iki ölkədə fəaliyyət göstərən biznes strukturlarının inteqrasiyasına təkan verəcək”.

Sloveniyanın baş nazirin müavini, xarici işlər və Avropa işləri naziri Tanya Fayon nəzərə çatdırıb ki, Orta Dəhliz beynəlxalq ticarətin inkişafı üçün əhəmiyyətli xarakter daşıyır: “Sloveniya enerji sahəsində əməkdaşlıqla yanaşı Azərbaycanla tranzit sahəsində də əməkdaşlıq əlaqələrini inkişaf etdirmək niyyətindədir. Orta Dəhliz vasitəsilə Sloveniya Mərkəzi Asiya və digər Şərq ölkələri ilə ticarət əlaqələrini artırmaq niyyətindədir”.

Çıxış edən digər natiqlər də əczaçılıq, turizm, səhiyyə, kənd təsərrüfatı, qarşılıqlı sərmayə yatırımı sahələrindəki əlaqələrdən danışdılar. Qeyd olunub ki, müasir dünyada dövlətlərin iqtisadi sahələr üzrə əməkdaşlığı və qarşılıqlı mehriban münasibətlər inkişafın təməlini təşkil edir.

Sonra yerli iş adamları və şirkət rəhbərlərinin Sloveniyadan gələn həmkarları ilə B2B və B2G formatında müzakirələr aparıblar. Müzakirələr zamanı iş adamları ölkəmizdəki biznes mühiti, vergi sistemi və başqa məsələlər haqqında məlumat veriblər.

Turizm, əczaçılıq, kənd təsərrüfatı sahələrində fəaliyyət göstərən şirkətlər qarşılıqlı səfərlərin zəruriliyini bildirib və əməkdaşlıq əlaqələrinin davam etdirilməsi barəsində razılıq əldə ediblər.