Dekabrın 19-da Bakıda keçirilən Azərbaycan-Səudiyyə Ərəbistanı İnvestisiya Forumunda bir sıra sənədlər imzalanıb.

AZƏRTAC xəbər verir ki, forum çərçivəsində İqtisadiyyat Nazirliyi yanında Kiçik və Orta Biznesin İnkişaf Agentliyi (KOBİA) ilə Səudiyyə Ərəbistanının Palatalar Federasiyası arasında birgə Biznes Şurasının yaradılması haqqında Saziş imzalanıb. Sənədi Səudiyyə Ərəbistanı-Azərbaycan Biznes Şurasının sədri Əhməd Aldaxil və KOBİA İdarə Heyətinin sədri Orxan Məmmədov imzalayıb.

Səudiyyə Ərəbistanının “FlyNas” şirkəti Azərbaycanın “Alines Tours”, “Fovero Tours” və “Khazar Travel” şirkətləri ilə turizm sahəsində yerüstü xidmətlərin asanlaşdırılmasını nəzərdə tutan anlaşma memorandumları imzalayıb. Səudiyyə Ərəbistanının ARCO şirkəti ilə Azərbaycanın Məşğulluq Agentliyi (“HRcell”) arasında da Anlaşma Memorandumu imzalanıb. Memorandumu ARCO şirkətinin sədri Fahad Alzoba və "HRcell" şirkətinin direktoru Ağahüseyn Əliyev imzalayıblar.

Eyni zamanda, Səudiyyə Ərəbistanının “Albawani Co” şirkəti ilə Azərbaycanın “North West Construction” MMC arasında iki ölkənin podratçılıq, tikinti və sənaye sahələrində əməkdaşlığı nəzərdə tutan Anlaşma Memorandumu imzalanıb. Sənədi “Albawani Co” şirkətinin vitse-prezidenti Əbdüləziz Alfraidi və “North West Construction” MMC-nin İdarə Heyətinin sədri Elçin Bədəlov imzalayıblar. Həmçinin Səudiyyə Ərəbistanının “A.Alrabiah Consulting Engineers” şirkəti ilə Azərbaycanın “Technicon Engineers Consulting” şirkəti arasında Anlaşma Memorandumu imzalanıb və sənəd texniki sahələrdə (məsələn, metro, bina və digər infrastruktur) mühəndislik xidmətlərinin göstərilməsini nəzərdə tutur. Memorandumu “Alrabiah Consulting Engineers” şirkətinin prezidenti Əbdülrəhman Əlrbiah və “Technicon Engineers Consulting” şirkətinin direktoru Qulu Məmmədov imzalayıb.

Bundan başqa, Səudiyyə Ərəbistanının “Al Suvaiket and Al Busaiyes Lauyers and Legal Consultants Co.” şirkəti ilə Azərbaycanın “Black Garden investisiya və korporativ məsləhət” şirkəti arasında Səudiyyə Ərəbistanı və Azərbaycanda investorlara hüquqi xidmətlər və biznes dəstəyi göstərməyi nəzərdə tutan əməkdaşlıq haqqında Saziş imzalanıb. Sazişi “Al Suvaiket and Al Busaiyes Lauyers and Legal Consultants Co.” şirkətinin təsisçisi və icraedici partnyoru Badir Əl Busayes və “Black Garden investisiya və korporativ məsləhət” şirkəti şirkətinin təsisçisi və icraedici partnyoru Emin Kərimov imzalayıblar