Mayın 11-də Dövlət Su Ehtiyatları Agentliyi Ulu Öndər Heydər Əliyevin 100 illiyi münasibətilə “Azərbaycanın su təsərrüfatı sektorunun inkişafı Ümummilli Lider Heydər Əliyevin adı ilə bağlıdır” mövzusunda elmi-praktik konfrans keçirib.

AZƏRTAC xəbər verir ki, tədbir əvvəlcə Ümummilli Liderin ölkənin su təsərrüfatı sahəsindəki fəaliyyətini əks etdirən qısametrajlı film nümayiş olunub.

Azərbaycan Meliorasiya və Su Təsərrüfatı Açıq Səhmdar Cəmiyyətinin (ASC) sədrinin müşaviri Əsəd Şirinov çıxış edərək bildirib ki, müasir Azərbaycan tarixinin taleyüklü hadisələrlə dolu əhəmiyyətli bir dövrü Heydər Əliyevin adı ilə bağlıdır. Ölkəmizdə siyasi sabitliyin qorunması, hüquqi dövlət quruculuğu, milli təhlükəsizliyin təmin olunması və yeni iqtisadi kursun müəyyənləşdirilməsi Ümummilli Lider Heydər Əliyevin tarixi xidmətləri sayəsində mümkün olub.

Ə.Şirinov əlavə edib ki, “su verən, bulaq yaradan, çay açan hər bir insan həmişə xalqın, millətin, insanların məhəbbətini qazanır” fikrinin müəllifi, böyük dövlət xadimi Heydər Əliyevin Azərbaycanın içməli su sektorunda misilsiz xidmətləri var. Uzaqgörən siyasətçi və böyük dövlət xadimi əhalinin həyat səviyyəsinin yüksəldilməsinin başlıca amillərindən olan içməli su ehtiyatlarından səmərəli istifadə, əhaliyə verilən suyun keyfiyyətinin yaxşılaşdırılması məsələsini həmişə önə çəkib.

Onun sözlərinə görə, 1969-cu ildə Ulu Öndər Heydər Əliyevin respublika rəhbərliyinə gəlməsindən sonra su təsərrüfatı sektorunun inkişafı prioritet istiqamətlərdən biri olub. Su ehtiyatlarının səmərəli idarə olunması, istifadəsi və mühafizəsi sahəsində əsaslı işlər Ulu Öndərin təşəbbüsü və rəhbərliyi ilə həyata keçirilib. Ağstafaçay, Sərsəng, Yuxarı Xanbulançay su anbarları, Mil-Muğan, Lənkərançay hidroqovşaqları, həmçinin Baş Mil kanalı məhz Ulu Öndərin Azərbaycana rəhbərlik etdiyi dövrdə tikilərək istismara verilib.

Bildirib ki, Ümummilli Liderin təşəbbüsü və birbaşa rəhbərliyi ilə 1970-71-ci illərdə Sovet İttifaqının ən böyük sutəmizləyici qurğularından sayılan Kür Sutəmizləyici Qurğular Kompleksi inşa edilib, burada emal olunan suyun Abşeron yarımadasına nəqli üçün magistral kəmərlər çəkilib. Bu layihə Bakıda salınan yaşayış massivlərinin tələbatını ödəməklə paytaxta yeni həyat gətirib.

Sədr müşaviri əlavə edib ki, 1970-80-ci illərdə Ulu Öndərin birbaşa nəzarəti altında Bakı şəhərinin tullantı su infrastrukturunun inkişafını nəzərdə tutan “Böyük kanalizasiya” layihəsi reallaşdırılmışdır. Həmin dövrdə Azərbaycanın ən böyük tullantı sutəmizləyici qurğusu olan Hövsan Aerasiya Stansiyası, “Sənaye zonası”, “Şəhərkənarı” və “Sahil” kollektorları inşa edilib. Azərbaycanın əksər rayon mərkəzlərində mərkəzləşdirilmiş içməli su və kanalizasiya sistemlərinin yaradılması ötən əsrin 70-80-ci illərinə təsadüf edir. Həmin dövrdə Ulu Öndərin rəhbərliyi ilə bölgələrdə yeni su mənbələri yaradılıb, sugötürücü və sutəmizləyici qurğular, su anbarları, nasos stansiyaları, magistral kəmərlər və paylayıcı şəbəkələr tikilib.

Ölkəmiz müstəqillik əldə etdikdən sonra Ulu Öndər Heydər Əliyevin yenidən hakimiyyətə qayıdışı ilə içməli və tullantı su sektorunda yeni mərhələ başlanıb. Ümummilli Liderin səyi nəticəsində yaranmış siyasi sabitliyi nəzərə alan Dünya Bankı keçmiş sovet respublikaları arasında ilk dəfə olaraq Azərbaycana “Böyük Bakının su təchizatı sisteminin yenidən qurulması layihəsi” çərçivəsində güzəştli kredit ayırmışdı. Bakı şəhərinin içməli su təchizatının yaxşılaşdırılmasına səbəb olan Oğuz-Qəbələ-Bakı su kəmərinin çəkilişi ilə bağlı təşəbbüsün müəllifi də Ümummilli Lider Heydər Əliyev olub. Ulu Öndər Oğuz-Qəbələ-Bakı su kəmərinin çəkilməsi barədə tapşırıq və tövsiyələrini vermiş və bu layihənin icrası paytaxtın su təchizatını əhəmiyyətli dərəcədə yaxşılaşıb.

Qeyd edib ki, əsası Ümummilli Lider Heydər Əliyev tərəfindən qoyulub, hazırda Prezident İlham Əliyevin rəhbərliyi ilə həyata keçirilən genişmiqyaslı islahatlar nəticəsində bütün sahələr kimi içməli su təsərrüfatı sektoru da yeni inkişaf dövrünə qədəm qoyub. Prezidentin təşəbbüsü və rəhbərliyi ilə Şəmkirçay, Taxtakörpü, Tovuzçay, Göytəpə su anbarları, Taxtakörpü-Ceyranbatan su kanalı kimi böyük infrastruktur layihələri ölkəmizdə həm suvarma, həm də içməli su ilə təminatının yaxşılaşdırılmasına töhfələr verib.

Azərbaycan Meliorasiya və Su Təsərrüfatı Açıq Səhmdar Cəmiyyətinin (ASC) sədr müavini Zakir Quliyev çıxışında qeyd edib ki, müasir meliorasiya və irriqasiyanın təməlinin hələ keçən əsrin əvvəllərində qoyulmasına baxmayaraq, əsas inkişaf Ümummilli Lider Heydər Əliyevin 1969-1982-ci illərdə respublikamıza rəhbərlik etdiyi dövrə təsadüf edir. Bu illərdə su təsərrüfatı sahəsində böyük quruculuq işləri aparılıb, güclü istehsal bazasına, tikinti və istismar təşkilatlarına, elmi-tədqiqat və layihə institutlarına malik ixtisaslaşmış meliorasiya və su təsərrüfatı kompleksi, geniş və tutarlı meliorasiya potensialı yaradılıb.

Sədr müavini əlavə edib ki, Ulu Öndər Heydər Əliyevin1993-cü ildə yenidən hakimiyyətə qayıdışı ilə meliorasiya və su təsərrüfatı öz inkişafının yeni mərhələsinə qədəm qoydu. Bu sahəyə diqqət və dövlət qayğısı bərpa olundu, mövcud meliorasiya potensialının dağılmasının qarşısı alındı, ondan daha səmərəli istifadə olunması yolları və sahənin gələcək inkişaf istiqamətləri müəyyənləşdirildi. Azərbaycanda mövcud meliorasiya potensialı qorunub saxlanıldı. Aqrar islahatının bir hissəsi olaraq meliorasiya və su təsərrüfatı sahəsində islahatların torpaq islahatı ilə birlikdə, kompleks şəkildə aparılması nəzərdə tutuldu. İslahatların normativ-hüquqi bazası yaradıldı. Bu məqsədlə 30-dan artıq normativ-hüquqi sənəd hazırlandı.

Zakir Quliyev bildirib ki, Ümummilli Liderin layiqli davamçısı İlham Əliyevin sayəsində bu gün Azərbaycan tarixinin ən qüdrətli dövrünü yaşayır. Belə ki, Prezidentinin rəhbərliyi altında iqtisadiyyatımızın inkişafında mühüm əhəmiyyət kəsb edən meliorasiya və su təsərrüfatı sahəsində müasir idarəetmə sisteminin təşkili, innovativ metodların, yeni suvarma texnologiyalarının və texnikanın tətbiqi, coğrafi elektron informasiya sistemini yaradılması, işğaldan azad olunan ərazilərdə Xaçınçay, Köndələnçay su anbarının və magistral kanalının təmir-bərpası, Tərtərçay Sol Sahil kanalının yenidənqurulması uğurla davam etdirilir. Eyni zamanda Ağdam, Füzuli və Cəbrayıl rayonlarının ərazilərində meliorasiya və su təsərrüfatı komplekslərinin bərpası, eləcə də Qız qalası su anbarından su götürən magistral kanalın tikintisinin, sututumu 90,8 milyon kubmetr olan Həkəriçay və Qubadlı rayonu ərazisində yerləşən sututumu 67 milyon kubmetr olan Bərgüşadçay su anbarlarının texniki-iqtisadi əsaslandırmasının və layihə sənədlərinin hazırlanması, Qubadlı və Zəngilan rayonlarının 12 min hektara yaxın əkin sahələrinin suvarma suyu ilə təmin edilməsi üçün sututumu 26,7 mln. kbm olan Zabuxçay su anbarının və magistral boru kəmərlərinin layihələndirilməsi və tikintisi işlərinin aparılmasına başlanılıb.

Sədr müavini əlavə edib ki, cari ildə Zəngilan, Qubadlı, Kəlbəcər və Laçın rayonları üzrə meliorasiya və su təsərrüfatı komplekslərinin bərpası ilə əlaqədar texniki-iqtisadi əsaslandırma və layihə-smeta sənədlərinin hazırlanması işlərinə başlanılacaq.

Daha sonra tədbir panel iclasları ilə davam edib.