Azərbaycanın Rus İcmasının Respublika Şurası sentyabrın 9-da iclas keçirib. Azərbaycan xalqının Ümummilli Lideri Heydər Əliyevin anadan olmasının 100 illiyinə və Azərbaycanın Rus İcmasının yaradılması və fəaliyyətinin 30 illiyinə həsr olunmuş tədbir Səməd Vurğun adına Azərbaycan Dövlət Akademik Rus Dram teatrında təşkil edilib.

AZƏRTAC xəbər verir ki, iclasda çıxış edən Azərbaycanın Rus İcmasının sədri Mixail Zabelin 90-cı illərin əvvəllərində Azərbaycan üçün ağır dövrdə burada yaşayan rusların ölkəni tərk etməməsində Ümummilli Lider Heydər Əliyevin rolundan danışıb.

Mixail Zabelinin sözlərinə görə, Rus İcması Azərbaycan xalqına, Heydər Əliyevin xatirəsinə, Prezident İlham Əliyevə və Birinci vitse-prezident Mehriban Əliyevaya hər zaman minnətdarlıqla yanaşacaq, Azərbaycanda yaşayan müxtəlif etnik qruplara, millətlərə göstərdikləri səmimiliyi yüksək qiymətləndirəcək.

Rus İcması rəhbərinin birinci müavini Anastasiya Lavrina çıxışında Azərbaycanda ruslara göstərilən xeyirxah münasibətə toxunub. "Ruslar özlərini rus kimi hiss etməkdən, tarixi kökləri haqqında danışmaqdan və eyni zamanda vətənlərinin müdafiəsinə qalxmağa hazır olan layiqli ölkə vətəndaşı olmaqdan qorxmurlar... Bu gün biz Azərbaycanın həyatına özümüzü ahəngdar şəkildə inteqrasiya olunmuş hiss edirik. Cəmiyyətimizdə milli kimliyə riayət olunur və hörmət edilir, rus dilinin, rus mədəniyyətinin inkişafı dəstəklənir və bu, şübhəsiz ki, bütün xalqın həyatını zənginləşdirir", - deyə o vurğulayıb.

“Rossotrudniçestvo”nun Azərbaycandakı nümayəndəliyinin rəhbəri İrek Zinnurov əmin olduğunu bildirib ki, ölkədə ruslara səmimi münasibəti nəzərə alaraq, demək olar ki, Azərbaycandakı Rus İcması bundan sonra hələ 200 illiyini qeyd edəcək.

Sonra fəal üzvlər mükafatlandırılıb.

Tədbir bədii hissə ilə davam edib.