Fevralın 22-də “Qadınlara qarşı zorakılıq və məişət zorakılığı işləri üzrə mühafizə orderləri: beynəlxalq standartlar və Azərbaycanın milli təcrübəsi” hesabatının təqdimatı ilə bağlı yekun konfrans keçirilib.

AZƏRTAC xəbər verir ki, hesabat Avropa İttifaqı və Avropa Şurasının “Azərbaycanda İstanbul Konvensiyası və digər gender bərabərliyi standartlarına dair məlumatlılığın artırılması” layihəsi çərçivəsində Ailə, Qadın və Uşaq Problemləri üzrə Dövlət Komitəsi ilə əməkdaşlıq çərçivəsində hazırlanıb.

Konfransda çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, hesabat daxili qanunvericilik bazasının və siyasətin beynəlxalq standartlara daha da uyğunlaşdırılmasında Azərbaycanın səlahiyyətli orqanlarına dəstək olmaq məqsədi daşıyır. Həmçinin hesabat Azərbaycan Respublikasında məişət zorakılığı ilə mübarizəyə dair 2020–2023-cü illər üçün Milli Fəaliyyət Planının icrasına öz töhfəsini verəcək.

Dövlət Komitəsinin sədri qeyd edib ki, Azərbaycanda “Məişət zorakılığının qarşısının alınması haqqında” Qanunun qəbulundan üç il keçib, bu müddət ərzində ölkədə xeyli iş görülüb. Bu Qanunun icrası prosesində, Avropa İttifaqı ilə Avropa Şurasının “Azərbaycanda İstanbul Konvensiyası və digər gender bərabərliyi standartlarına dair məlumatlılığın artırılması” layihəsi çərçivəsində qadınlara qarşı və məişət zorakılığı ilə bağlı qanunvericilik bazası təhlil edilib, mövcud boşluqlar müəyyənləşib. Ötən müddət ərzində Azərbaycanda məişət zorakılığına qarşı ciddi işlər görülüb. Bu sahədə nəzərdə tutulan bir sıra məsələlər artıq öz müsbət nəticəsini göstərir. Layihə çərçivəsində görülən işlər bu sahədəki vəziyyətə xeyli töhfə verib.

Komitə sədri bildirib ki, ölkəmizdə mühafizə orderlərinin tətbiqi ilə bağlı müəyyən çətinliklər var. Bu da mühafizə orderi məsələsinin düzgün dərk edilməməsi və onun tətbiqi sahəsində nöqsanlarla bağlıdır. Bir qayda olaraq qısamüddətli mühafizə verilir, təhlükə davam etdikcə uzunmüddətli mühafizə orderlərinin verilməsi gecikir. Bununla bağlı təkliflər paketi hazırlanıb. Bura zərərçəkmiş şəxslərin müdafiəsi üzə çevik və adekvat mühafizə mexanizminin yaradılması, pulsuz hüquqi yardım verilməsi daxildir.

Konfransa onlayn formatda qoşulan Avropa Şurası, Gender Bərabərliyi Bölümünün rəhbəri Katerina Boloqnez layihə çərçivəsində həyata keçirilən işlərdən bəhs edib. Qeyd edib ki, layihənin icrası müddətində Azərbaycanda qadınlara qarşı zorakılıq və məişət zorakılığı sahəsində qanunvericilik və siyasət bazısının beynəlxalq standartlara daha da uyğunlaşdırılması sahəsində işlər görülüb. Təcili mühafizə orderlərinin vacibliyinə toxunan Katerina Boloqnez bu sahədə Azərbaycanda önəmli addımların atıldığını söyləyib.

Tədbirdə Avropa Şurasının məsləhətçisi Roza Loqar, AQUPDK-nın şöbə müdiri Taliyə İbrahimova mühafizə orderləri üzrə hesabatı təqdim ediblər, əsas nəticə və tövsiyələri iştirakçıların diqqətinə çatdırıblar.

Sonra hesabatın müzakirəsi aparılıb.