Azərbaycan Kardiologiya Cəmiyyətinin XI Milli konqresi çərçivəsində Səhiyyə Nazirliyi, İcbari Tibbi Sığorta üzrə Dövlət Agentliyi, Tibbi Ərazi Bölmələrini İdarəetmə Birliyi və Azərbaycan Kardiologiya Cəmiyyətinin birgə layihəsi olan “Stent - Save a Life” layihəsi təqdim olunub.

AZƏRTAC xəbər verir ki, Azərbaycan Kardiologiya Cəmiyyətinin sədri Üzeyir Rəhimovun sözlərinə görə, bu müalicə üsulu dünyanın aparıcı ölkələrində 15-20 ildir ki, tətbiq olunur: “Xəstə infarkt keçirtdiyi zaman onun damar yolları nə qədər tez açılarsa, xəstənin yaşama şansı artır. Həmçinin əlillik halının qarşısı alınır, insan ömrü uzanır və dövlətin sərf elədiyi maliyyə vəsaiti azalır. Ağır ürək çatışmazlığından əziyyət çəkən xəstələrə mürəkkəb əməliyyatlar tətbiq olunur, cihazlar qoyulur və onların davamlı olaraq xəstəxanaya yatışlarına ehtiyac yaranır ki, bu da dövlət büdcəsinə ciddi zərər vurur. Layihənin məqsədi ondan ibarətdir ki, xəstə infarkt keçirdiyi zaman onun birbaşa damar probleminin həll edildiyi mərkəzə aparılmasını, xəstəxanada daha az qalmasını, daha çox yaşamasını, əlillik və fəsadların azalmasını təmin etməkdir. MDB ölkələri arasında ilk dəfə Azərbaycanda tətbiq olunacaq bu layihə tam olaraq gələn ildən fəaliyyətə başlayacaq. Düşünürük ki, bu, digər ölkələrə də nümunə olacaq”.

Ü.Rəhimov bildirib ki, layihə Bakıda başlayacaq, daha sonra angioqrafiya mərkəzlərinin olduğu Gəncə, Naxçıvan və Sumqayıt şəhərlərində tətbiq olunacaq: “Lənkəran və Şəkidə də xəstəxanalar açılacaq və orada da angioqrafiya mərkəzləri qurulacaq. Ölkədə yeddi angioqrafiya mərkəzinin qurulması nəzərdə tutulur ki, bu da Azərbaycanın kardioloji problemlərini həll edəcək. Həmin mərkəzlər bütün ölkə əhalisini əhatə edə biləcək. Məsələn, bir rayondakı mərkəzin xidmətlərindən ətraf rayonların sakinləri də yararlana biləcəklər”.

Cəmiyyətin sədri konqres barəsində də məlumat verib: “Azərbaycan Kardiologiya Cəmiyyətinin XI Milli Konqresi bu il keçirdiyimiz 21 toplantıdan biri və ən böyüyüdür. Konqresdə 620 nəfər iştirak edir. Əsas məqsəd həkimlərin bilik və bacarığının artırılması, təcrübələrin bölüşülməsi, yeniliklərin paylaşılmasıdır”.

Xatırladaq ki, konqresin işinə dekabrın 11-də yekun vurulacaq