Martın 15-də Gəncliyə Yardım Fondunun təşkilatçılığı ilə Azərbaycan və Türkiyə xanımlarının əl işləri xeyriyyə sərgisi təşkil edilib.

Tədbirdə əvvəlcə zəlzələdə həyatlarını itirənlərin ruhu bir dəqiqəlik sükutla yad edilib və Azərbaycanın Dövlət Himni və Türkiyə Cümhuriyyətinin İstiqlal marşı səsləndirilib.

AZƏRTAC xəbər verir ki, sərgidə məqsəd fevral ayında qardaş Türkiyədə baş verən və əsrin fəlakəti adlandırılan dəhşətli zəlzələdə zərər görən insanlara dəstəkdir.

Sərginin açılış mərasimində Gəncliyə Yardım Fondunun prezidenti Ahmet Tecim bildirib ki, ənənəvi xeyriyyə sərgisinə Azərbaycan xalqının marağı yüksək səviyyədədir. Bizim mədəniyyətimiz xeyriyyəçilik mədəniyyətidir. Bu ruhla hərəkət edən azərbaycanlı və türkiyəli xeyriyyəçi xanımlar 19 ildir bu layihələrdə iştirak edirlər.

Ahmet Tecim layihələrin “Xocalıya Yardım", "Qarabağ Suallar və Faktlar" kitabının nəşri, "Yeddi Uşaq Evinə Yardım", "Qocalar Evinə Yardım", "Uşaqlar Arasında Dişlərə Qulluq Mədəniyyətinin Formalaşması", "Qarabağ Suallar və Faktlar" kitabının türk dilində nəşri, “25 əlilə əlil arabası”, “50 imkansız tələbəyə bir illik təqaüd”, “Yüz imkansız ailəyə bir illik ərzaq yardımı”, “101 Arzunu Gerçəkləşdir”, “101 Ehtiyac Sahibi Ailəyə Yardım”, “Körpələri Sevindirək”, “Ümidsizlərin Ümidi Ol”, “Bir Həyata Yol Ver”, “Şəhidlərimizin Övladları Bizə Əmanətdir”, “100 İllik Əmanət”, “Qardaşlığımız Əbədidir”, “Könüllü Ol, Bir Həyat da Sən Dəyiş”, Sabahlara Ümid Ol”, “Kitabın İşığın Olsun”, “Əmanətə Sahib Çıx” kimi mövzulara həsr olduğunu deyib.

Türkiyənin Azərbaycandakı səfiri Cahit Bağcı builki xeyriyyə sərgisindən əldə olunacaq vəsaitin Gəncliyə Yardım Fondunun Qardaş Köməyi Platforması ilə birgə həyata keçirdiyi “Qardaşın acılarına qardaş olaq” layihəsində istifadə olunmasının planlaşdırıldığını bildirib. O qeyd edib ki, Türkiyə bu yaraları sağaldacaq gücdədir. Bu acılar bir tərəfdən də millət olaraq birliyimizi, qardaşlığımızı daha da möhkəmləndirir.

Qeyd edək ki, sərgi üç gün davam edəcək.