Yanvarın 13-də Rusiyanın mətbuat nümayəndələri öz peşə bayramlarını – Rusiya Mətbuat Gününü qeyd edirlər. Bu tarix 1703-cü il yanvarın 13-də Rusiyanın ilk çap qəzeti olan “Vedomosti”nin işıq üzü görməsi ilə əlaqədardır.

AZƏRTAC xəbər verir ki, ənənəvi olaraq Rusiya-Azərbaycan münasibətlərini fəal şəkildə işıqlandıran kütləvi informasiya vasitələrinin təmsilçiləri ilə bu bayram şərəfinə Bakıdakı Rus evində görüş keçirilir.

Görüşdə bir sıra jurnalist və nəşrlərə Bakıdakı Rus evinin fəxri fərmanları təqdim olunub. Azərbaycan Dövlət İnformasiya Agentliyinin (AZƏRTAC) əməkdaşı Leyla Muradzadə də təltif edilənlər arasında olub.

Mükafatları Rusiyanın Azərbaycandakı səfirliyinin mətbuat katibi Alina Zolotaryova və “Rossotrudniçestvo”nun Azərbaycandakı nümayəndəliyinin şöbə müdiri Dmitri Yeqorov təqdim ediblər.