Azərbaycan Dövlət İqtisad Universitetində “Enviromental Protection First” Koalisiyası tərəfindən seminar keçirilib. Tədbirdə universitetin tələbələrinə Ermənistanın Cənubi Qafqazın ekologiyasını zəhərləyən dağ-mədən sənayesi fəaliyyətini ifşa edən interaktiv rəqəmsal xəritə barədə məlumat verilib. Seminarda ekologiya mühəndisliyi və iqtisadi idarəetmə ixtisasları üzrə təhsil alan tələbələr iştirak ediblər.

AZƏRTAC xəbər verir ki, tədbirdə koalisiyanın həmtəsisçisi, Ekologiya və Təbii Sərvətlər Nazirliyi yanında İctimai şuranın sədri Amin Məmmədov Ermənistanın torpaqlarımızı işğal altında saxladığı zaman təbii sərvətlərimizi, o cümlədən qiymətli metalları istismar etməsindən danışıb. 2022-ci il dekabrın 12-dən etibarən Laçın-Xankəndi yolunun Şuşa ərazisindən keçən hissəsində keçirilən ekoloji aksiyanı xatırladan A. Məmmədov bildirib: "Həmin aksiyada ekofəallar olaraq təbii sərvətlərimizin qeyri-qanuni istismarına etirazımızı bildirdik. Söhbət Dəmirli və Qızılqulaq yataqlarından gedirdi. 27 ildən çox müddətdə Qarabağ regionunun hava, su və torpağının qeyri-qanuni istismara məruz qalması maliyyə dəyəri ilə hesablanmalıdır. Ölkəmizin təbiətinə böyük zərər dəyib. Biz bu məlumatları Azərbaycan hökumətinə təqdim etmişik. Ermənistan beynəlxalq konvensiyalar qarşısında üzərinə götürdüyü öhdəliklərə əməl etmir".

"Azərbaycan Kartoqrafları" İctimai Birliyinin sədri Müqabil Bayramov sözügedən xəritənin 3 dildə hazırlandığını və elektron variantınının bir müddət öncə geniş ictimaiyyətə təqdim olunduğunu xatırladıb: "Bu elektron xəritəni müxtəlif məlumatlar toplusu adlandırmaq olar. Koalisiyanın saytında yerləşdirilən xəritə hər kəsə açıqdır. Ən müasir üsullarla kosmik görüntülərdən istifadə olunmaqla hazırlanan xəritə bir daha sübut edir ki, Ermənistan tərəfindən transsərhəd çaylar ağır metallarla çirkləndirilir. Bunların hamısı Kür və ya Araz çayına axıdılır. Flora və faunanın çirkləndirilməsinə səbəb olan 13-ə yaxın zavod və fabrik haqqında məlumatlar xəritədə yerləşdirilib".

Tədbirdə, həmçinin bildirilib ki, xəritə hazırlanarkən Qeyri-hökumət təşkilatlarının apardıqları monitorinqlərin nəticələri nəzərə alınıb. Xəritədə Qarabağ ərazisinda yerləşən yaşayış məntəqələri ilə yanaşı, 600-ə qədər çay və dağ adı qeyd edilib, yer adları Azərbaycan toponimləri ilə göstərilib.

İnteraktiv formada keçirilən seminarda tələbələri maraqlandıran suallar cavablandırılıb.