Azərbaycan “Hava gəmilərində törədilmiş cinayətlər və bəzi digər aktlar haqqında” Konvensiyada dəyişiklik edilməsinə dair Protokol”a qoşulur.

AZƏRTAC xəbər verir ki, bununla bağlı qanun layihəsi Milli Məclisin Hüquq siyasəti və dövlət quruculuğu komitəsinin sentyabrın 14-də keçirilən iclasında müzakirəyə çıxarılıb.

Qeyd edilib ki, Azərbaycan Respublikasının 2003-cü il 9 dekabr tarixli 546-IIQD nömrəli Qanunu ilə ölkəmiz 1963-cü il sentyabrın 14-də Tokio Şəhərində imzalanmış “Hava gəmilərində törədilmiş cinayətlər və bəzi digər aktlar haqqında Konvensiya”ya qoşulub. Dövlətlərin hava gəmilərinin göyərtəsində intizamsız davranış hallarının qarşısının alınması və lazımı nizam-intizamın bərqərar olunması məqsədilə “Hava gəmilərində törədilmiş cinayətlər və bəzi digər aktlar haqqında Konvensiyada dəyişiklik edilməsinə dair Protokol” 2014-cü il aprelin 4-də Monreal şəhərində imzalanıb. Protokol preambula və 20 maddədən ibarətdir. Protokolun müddəalarına əsasən Konvensiyanın 1-ci maddəsinin 3-cu bəndinin, 2-ci, 3-cü, 6-cı, 9-cu, 10-cu, 17-ci maddələrinin və 16-ci maddəsinin 1-ci bəndinin yeni redaksiyada verilməsi, yeni 3 bis, 15 bis, 18 bis maddələrinin əlavə edilməsi və 5-ci maddənin 2-ci bəndinin ləğv edilməsi nəzərdə tutulub.

Protokolun 2-ci maddəsinə asasan, hava gəmisinin uçuşda olma müddətinin müəyyən edilməsinin meyarları dəqiqləşdirilib. Protokolun 4-cü maddəsinə görə hava gəmisinin göyərtəsində törədilmiş cinayət və bəzi digər aktlara münasibətdə hava gəmisinin ərazisinə eniş etdiyi dövlət və istismarçı dövlət tərəfindən yurisdiksiyanın həyata keçirilməsi qaydaları müəyyən edilib. Protokola əsasən Konvensiyanın mətninə əlavə edilən yeni 15 bis maddəsinin tələblərinə müvafiq olaraq Konvensiyanın 1-ci maddəsinin 1-ci bəndində qeyd edilən, həmçinin “ekipaj üzvünə fiziki hücum, yaxud belə hücumla təhdid etmə”, “hava gəmisinin, onun göyərtəsində olan sərnişinlərin, yaxud əmlakın təhlükəsizliyini təmin etmək məqsədilə hava gəmisinin kapitanı tərəfindən və ya onun adından verilən qanuni göstərişləri yerinə yetirməkdən imtina” cinayətlərini və yaxud cinayət hesab edilməyən digər aktları törədən şəxslər barəsində razılığa gələn dövlət tərəfindən cinayət, inzibati və ya məhkəmə icraatının istənilən digər növünün başlanılması nəzərdə tutulub.

Yuxanda qeyd olunanlarla yanaşı Protokolda Konvensiyanın Maddələrinə əsasən endirilən, yaxud təhvil verilən şəxsdən milli qanunvericiliyə uyğun olaraq vurmuş olduğu ziyanın əvəzinin ödənilməsinin tələb edilməsi ilə bağlı və sair dəyişikliklər nəzərdə tutulub.

Protokol 2020-ci ilin yanvarın 1-də qüvvəyə minib.