Azərbaycan Fövqəladə Hallar Nazirliyi Türkiyənin zəlzələ bölgəsində qarşısına qoyduğu bütün tapşırıqları yerinə yetirib.

AZƏRTAC xəbər verir ki, bu sözləri nazirliyin Xüsusi Riskli Xilasetmə Xidmətin qərargah rəisi, polkovnik Asif Məmmədli jurnalistlərə müsahibəsində söyləyib.

Bildirib ki, fevralın 6-da Türkiyədə baş vermiş güclü zəlzələdən dərhal sonra Azərbaycan Prezidentinin tapşırığına əsasən, qardaş ölkəyə 760 nəfərdən ibarət xilasetmə, tibb və psixoloji təminat üzrə mütəxəssislər gediblər.

“Kahramanmaraş şəhərində axtarış-xilasetmə əməliyyatları apardıq. Həmin əməliyyatlarda dağıntılar altından 53 nəfər sağ və 766 cəsəd çıxarıldı. Xilasetmə əməliyyatları başa çatdıqdan sonra humanitar yardımla məşğul olduq, səhra hospitalında yerli əhaliyə psixoloji təminat göstərilirdi. Həmçinin müxtəlif yerlərdə çadır şəhərciyi quruldu və gündəlik əhaliyə isti yeməklər verildi”, -deyə qərargah rəisi qeyd edib.