Qardaş Türkiyədə dağıdıcı zəlzələ Azərbaycanda hamını sarsıdıb. Təbii ki, Azərbaycanın Rus icması da kənarda qala bilməzdi. Türkiyənin dəhşətli hadisənin nəticələrinin aradan qaldırılmasının öhdəsindən gəlməsi üçün biz ötən həftə humanitar yardım aksiyasını başlatdıq.

Bu barədə AZƏRTAC-a Azərbaycanın Rus icmasının sədr müavini Anastasiya Lavrina icma adından Türkiyədə zəlzələdən zərərçəkənlərə humanitar yardım göndərilməsi mərasimində bildirib.

Rus icmasının tezliklə Türkiyəyə göndəriləcək çoxlu humanitar yardım qutuları topladığını diqqətə çatdıran A.Lavrina deyib: “Bu hadisə Azərbaycan xalqının birliyini nümayiş etdirdi. Azərbaycandakı bütün etnik qruplar öz həmrəyliyini və Türkiyəyə başsağlığını ifadə etdilər. Qardaş ölkəyə sülh, əmin-amanlıq və tərəqqi, həmçinin güclü zəlzələnin törətdiyi dağıntıları tezliklə aradan qaldırmağı arzulayırıq”.