Böyük Qayıdış proqramı çərçivəsində işğaldan azad edilmiş ərazilərdə genişmiqyaslı məşğulluq tədbirlərinə və sosial xidmət infrastrukturunun qurulmasına başlandığı bildirilib. Artıq bu ərazilərə köçürülmüş 1100-dən çox şəxsin məşğulluğu təmin edilib, peşə hazırlığı proqramının icrasına başlanılıb, Füzuli və Laçında əmək yarmarkaları keçirilib.

AZƏRTAC xəbər verir ki, bu sözləri əmək və əhalinin sosial müdafiəsi nazirinin müavini Anar Əliyev nazirliyin ötənilki fəaliyyətinə həsr olunmuş mətbuat konfransında söyləyib.

A.Əliyev bildirib ki, hazırda 798 nəfərin məşğulluğa cəlb edilməsi istiqamətində işlər aparılır. Qeyd etmək lazımdır ki, 2023-cü il yanvarın 1-dən etibarən işğaldan azad olunmuş ərazilərdə işləyən mütəxəssislərin ilkin maddi-məişət şəraitinin dəstəklənməsi üçün birdəfəlik sosial müavinət təsis edilib. Həmin müavinətin məbləği 600 manatdır.

Nazir müavini diqqətə çatdırıb ki, qanunvericiliyə edilmiş dəyişikliklərə əsasən, həmin ərazilərdə işləyən mütəxəssislər üçün bir sıra güzəştlər müəyyən olunub.

“9 şəhər və rayonu əhatə edərək 900 mindən çox şəxsə xidmət göstərən Qarabağ Regional DOST Mərkəzi, həmçinin Qarabağ Regional Peşə Hazırlığı Mərkəzi istifadəyə verilib. İsmayıllıda DOST İnklüziv İnkişaf və Yaradıcılıq Mərkəzinin “DOST Evi” filialının açılışı olub”, - deyə nazir müavini əlavə edib.