Azərbaycan Ali Məhkəməsinin 100 illik yubileyi çox əlamətdar bir ilə təsadüf edir. Bu il mayın 10-da xalqımız müasir Azərbaycanın qurucusu, Ulu Öndər Heydər Əliyevin 100 illik yubileyini qeyd etməyə hazırlaşır. Müstəqil Azərbaycanda məhkəmə sisteminin inkişafı Ümummilli Liderin fəaliyyəti ilə sıx bağlıdır. Ulu Öndər məhkəmə sisteminə daim diqqət və qayğı ilə yanaşıb. Çox şadıq ki, bu yubiley Ümummilli Liderin yubileyi ilə üst-üstə düşür.

AZƏRTAC xəbər verir ki, bunu jurnalistlərə açıqlamasında Ali Məhkəmənin sədri Ramiz Rzayev söyləyib.

O bildirib ki, Prezident İlham Əliyev məhkəmə sisteminin inkişafına daim diqqət və qayğı ilə yanaşır. Son dövrlərdə aparılan islahatlar, məhkəmələrin maddi-texniki bazasının möhkəmlənməsi bu sahəyə göstərilən diqqət və qayğının nəticəsidir. "Biz hakimlərin isə əsas vəzifəsi qanunun aliliyini diqqətə almaqla, ədalət mühakiməsini yüksək səviyyədə həyata keçirməkdir. Biz bunun üçün çalışırıq", - deyə Ali Məhkəmənin sədri qeyd edib.